धुळे : महावितरण विभागाच्या लोड शेडिंग धोरणा विरोधात आक्रमक होत शिंदे गट शिवसैनिकांनी थेट चटया, तक्के घेऊन विजेवर चालणाऱ्या उपकरणांना सोबत घेऊन थेट धुळे शहरातील साक्री रोड येथील वीज वितरण कार्यालय गाठले. त्या ठिकाणी चटाया व तक्के टाकून कार्यालयामध्येच झोपून अनोख्या पद्धतीने आंदोलन केले आहे. 

गेल्या काही दिवसांपासून धुळे (Dhule) शहरामध्ये उष्णतेची लाट बघावयास मिळत असून अशा परिस्थितीमध्ये नागरिक उकाड्याने हैराण झाले आहेत. मात्र वीज वितरण विभागातर्फे वारंवार विजेचा पुरवठा खंडित केला जात असल्यामुळे नागरिकांना वीज वितरण (Mahavitaran) विभागाच्या या अनागोंदी कारभाराचा फटका मोठ्या प्रमाणात बसत आहे. वाढत्या उष्णतेचा त्रास देखील सहन करावा लागला आहे. यामुळेच वीज वितरण विभागाच्या या अनागोंदी कारभाराविरोधामध्ये शिवसेना शिंदे गटाचे पदाधिकारी व कार्यकर्ते चांगलेच आक्रमक झाले.

सरकारला घरचा आहेर

भर उन्हाळ्यात होत असलेल्या या भारनियमनाचा (Load Shedding) त्रास नागरिकांना होत आहे. या विरोधात (Shiv Sena) शिवसेना शिंदे गटाकडून आंदोलन करत सरकारला घरचा आहेर दिला आहे. चला झोपायला एमएसईबी ऑफिसला या घोषवाक्यासह शिंदे गटाचे पदाधिकारी व कार्यकर्ते वीज वितरण कार्यालयात झोपून आंदोलन केले. यावेळी वीज वितरण विभागाच्या अधिकाऱ्यांविरोधात तीव्र घोषणाबाजी देखील करण्यात आली.