धुळे : शिंदखेडा तालुक्यातील चिमठाणे येथील पेट्रोल पंपावर काम करणाऱ्या आदिवासी युवकावर प्राणघातक हल्ला करून हल्लेखोर घटनास्थळावरून पसार झाले. परंतु, हल्लेखोर अद्याप फरार असून पोलीस देखील या प्रकरणी कारवाई करत नसल्याचा आरोप करत पोलीस अधिकाऱ्यांच्या विरोधात डफ बजाओ आंदोलन करण्यात आले. शिंदखेडा तहसील कार्यालयाबाहेर हे आंदोलन करण्यात आले. 

धुळे जिल्ह्यातील शिंदखेडा तालुक्यातील चिमठाणे येथे पेट्रोल पंपावरील युवकावर प्राणघातक हल्ला करण्यात आल्याची घटना घडली होती. सदर घटनेला एक महिना उलटून देखील अद्याप शिंदखेडा पोलीस अधिकाऱ्यांनी हल्लेखोरांना पकडले नसून, त्यांच्यावर कुठल्याही प्रकारची कारवाई अद्याप करण्यात आलेली नाही. यामुळे युवकाच्या नातलगांसह आदिवासी बांधव आक्रमक झाल्याचे पाहण्यास मिळाले. 

सदर घटनेला एक महिना उलटून देखील तीन दिवसात संबंधित हल्लेखोरांना पकडून त्यांच्यावर कायदेशीर कारवाई करू असे आश्वासन पोलिसांनी दिले होते. मात्र आश्वासन देणाऱ्या अधिकाऱ्यांनी एक महिन्यानंतर देखील अद्याप कुठल्याही प्रकारची कारवाई केली नसल्यामुळे त्यांच्या कार्यप्रणालीवरच प्रश्नचिन्ह असल्याचे म्हणत अकार्यक्षम पोलीस अधिकारी व कर्मचाऱ्यांचे निलंबन करण्यात यावे, या मागणीसाठी भिल्ल समाज विकास मंचच्या वतीने शिंदखेडा तहसील कार्यालयाच्या बाहेर डफ वाजवून निषेध आंदोलन करण्यात आले. 

तर पोलीस महानिरीक्षकांच्या कार्यालयात आंदोलन 

तसेच भिल्ल समाज विकास मंचच्या वतीने पुढील आठ दिवसाच्या आत हल्लेखोरांना ताब्यात घेऊन त्यांच्यावर कायदेशीर कारवाई करण्याची मागणी केली आहे. कारवाई न झाल्यास नाशिक येथे पोलीस महानिरीक्षकांच्या कार्यालयातच डफ वाजवून या अकार्यक्षम अधिकाऱ्यांच्या विरोधात आंदोलन करण्याचा इशारा यावेळी संघटनेच्या पदाधिकारी व आंदोलकांनी दिला आहे.