धुळे : मेंढपाळ बांधवाना मेंढपालनासाठी काही जमिनी आरक्षित केल्या आहेत. परंतु या जमिनींवर अतिक्रमण झाले आहे. यामुळे अतिक्रमण धारकांचा बंदोबस्त करण्याच्या मागणीसाठी धनगर समाज संघर्ष समितीच्या वतीने आज शेकडो मेंढपाळ बांधवांनी जिल्हाधिकारी कार्यालयात ठिय्या देत आंदोलन करण्यात आले. 

मेंढपाळांसाठी दहा ते वीस हेक्टर क्षेत्र वनचराईसाठी आरक्षित असताना त्या ठिकाणी अतिक्रमण धारकांतर्फे वन जमिनीवर अतिक्रमण करण्यात आले आहे. इतकेच नाही तर मेंढपाळांना मेंढ्या चारण्यासाठी मज्जाव करण्यात येत असतो. (Dhule) वन अधिकारी देखील या संदर्भात मेंढपाळांना सहाय्य करत नसल्यामुळे याबाबत या मेंढपाळांनी गेल्या काही दिवसांपूर्वी मोठ्या प्रमाणात रास्ता रोको आंदोलन देखील केले होते. परंतु प्रशासनातर्फे त्यांना आश्वासन देण्यात येऊन देखील त्या आश्वासनांची पूर्तता करण्यात आली नसल्याचा आरोप करण्यात आला आहे. 

तर आठ दिवसांनी पुन्हा मोर्चा 

प्रशासन लक्ष देत नसल्याने या सर्व मेंढपाळांनी शेकडोंच्या संख्येने जिल्हाधिकारी कार्यालयावर पोहोचून जिल्हाधिकारी कार्यालयात ठिया दिला आहे. या संदर्भात जिल्हाधिकाऱ्यांना निवेदन देण्यात आले असून पुढील आठ दिवसांच्या आत हा प्रश्न मार्गी लावण्यासंदर्भात मागणी करण्यात आली आहे. पुढील आठ दिवसांमध्ये मेंढपाळांचा हा प्रश्न मार्गी लावण्यात न आल्यास हजारोंच्या संख्येने मेंढपाळ बांधव मेंढ्या घेऊन व बिऱ्हाड घेऊन जिल्हाधिकारी कार्यालयावर पोहोचतील; असा इशाराच संघटनेच्या वतीने देण्यात आला आहे.