धुळे : धुळे शहरातील कोळवले नगरात धुमस्टाईलने महिलेचा मोबाईल चोरुन नेल्याची घटना दहा दिवसांपुर्वी घडली होती. यासंदर्भात गुन्हा दाखल झाल्यानंतर शहर पोलिसांनी (Police) तपासाला वेग दिला असता दोघा चोरट्यांच्या मुसक्या आवळण्यात शोध पथकाला यश आले आहे. (Maharashtra News)

धुळे (Dhule) शहरातील कोळवले नगरात राहणाऱ्या सुनिता प्रशांत सोनार ही महिला आपल्या घरासमोरील रोडवर उभी होती. या दरम्‍यान दोन अज्ञात तरुणांनी मोटारसायकलवर येवून महिलेच्या हातातील मोबाईल जबरीने चोरुन नेला होता. यासंदर्भात महिलेने शहर पोलीस (Dhule Police) ठाण्यात धाव घेत फिर्याद दाखल केली होती. त्यानंतर पोलीस अधिकाऱ्यांना प्राप्त तांत्रिक माहितीच्या आधारे तपासाची चक्रे फिरवली.

५० हजाराचा मुद्देमाल जप्‍त

सदर मोबाईल चैतन्य जगदीश पाटील व आकाश रवींद्र वाघ या दोघांनीच चोरल्याचे निष्पन्न झाले. शोध पथकाला रवाना करुन दोघांना अटक करण्यात आली. पथकाने या दोघांकडून महिलेचा मोबाईल व गुन्ह्यात वापरलेली मोटारसायकल असा एकूण 50 हजार रुपयांचा मुद्देमाल जप्त केला आहे. दोघे चोरटे चितोडचे राहणारे आहेत.