धुळे : अवैध गॅस सिलेंडरचा साठा करण्यात आल्याची माहिती पोलिसांना मिळाली होती. यावरून धुळे शहर पोलिसांनी छापा टाकून जवळपास १६ अवैधपणे गॅस सिलेंडर जप्त केले. तसेच संबंधितांविरोधामध्ये धुळे शहर पोलीस ठाण्यात गुन्हा दाखल करण्यात आला आहे, तर दहा भरलेले गॅस सिलेंडर व सहा रिकामे गॅस सिलेंडर पोलिसांनी जप्त केले आहेत,

धुळे (Dhule) शहरातील चितोड रोड परिसरातील हटकरवाडी येथे तक्रारदाराने धुळे शहर पोलीस निरीक्षक धीरज महाजन यांना माहिती देऊन सदर ठिकाणी अवैधपणे गॅसचा साठा करून ठेवला असल्याची माहिती दिली. त्यानंतर धुळे शहर पोलिसांनी (Dhule Police) तात्काळ पथक सदर ठिकाणी पाठवून त्या ठिकाणी छापामारी केली. याठिकाणी जवळपास १६ अवैधपणे गॅस सिलेंडर साठवून ठेवल्याचे पोलिसांच्या निदर्शनास आले आहे. त्यातील दहा गॅस सिलेंडर हे भरलेले असून सहा गॅस सिलेंडर हे रिकामे असल्याचे निदर्शनास आले.  

पोलिसात गुन्हा दाखल 

संबंधितांना या १६ गॅस सिलेंडर संदर्भात परवाना विचारला असता कुठल्याही प्रकारचा परवाना त्यांच्याकडे नसल्याचे त्यांनी सांगितले. त्यानंतर धुळे शहर पोलिसांनी यासंदर्भात संबंधितांच्या विरोधात गुन्हा दाखल केला असून पुढील तपास धुळे शहर पोलीस करीत आहेत.