धुळे : वाघाडी (ता. धुळे) या गावातील शेतकऱ्याची गाभण गाय सर्पदंशाने मृत्युमुखी पडली. गायीच्‍या मृत्‍यूनंतर शेतकरी कुटुंबाने परिवारातील सदस्‍याप्रमाणे गावातून अंत्‍ययात्रा काढत अंतिमसंस्‍कार केले. (dhule-news-Death-of-cow-snake-bite-farmer's-family-conducted-the-funeral-procession)

वाघाडी येथील रामदास बाबुराव सूर्यवंशी या शेतकऱ्याची ही गाय होती. लळा लावला की रानातलं पाखरू देखील मानसाळत तसेच काहीसे या गायीच्या बाबतीत देखील सूर्यवंशी कुटुंबीयांनी लळा लावलेला होता. त्यामुळेच सूर्यवंशी कुटुंबीयांनी सर्पदंशाने मृत पावलेल्या आपल्या लाडक्या गायीचा अंत्यविधी घरातील सदस्याप्रमाणे केला आहे.

गावातील नागरीकही सहभागी

गायीच्या मृत्यूनंतर शेतकऱ्याने घरातील सदस्याप्रमाणे या गाईची वाजत गाजत अंतयात्रा गावातून काढली. गाईची अंत्ययात्रा बघून गावातील नागरिक देखील भारावून गेले. गायीच्‍या अंत्‍ययात्रेत गावातील काही नागरीक देखील सहभागी झाले होते.

शेतकरी कुटुंब रडले

कित्येक वर्षांपासून ही गाय घरात होती. गाईच्या दुधावर संपूर्ण कुटुंबीय अवलंबून होते. घरातील सदस्याचा मृत्यू झाला असावा अशा पद्धतीने सर्व कुटुंबीयांनी डोळ्यातून निघणाऱ्या अश्रूंच्या धारानी लाडक्या गायीला अखेरचा निरोप दिला आहे.