धुळे : धुळे ग्रामीणचे आमदार कुणाल पाटील यांच्या वाढदिवसानिमित्त धुळे शहरात विविध ठिकाणी शुभेच्छांचे बॅनर लावण्यात आले आहेत. या बॅनरवर आमदार कुणाल पाटील यांचा भावी कॅबिनेट मंत्री असा उल्लेख करण्यात आला आहे. यामुळे राजकीय वर्तुळामध्ये चर्चांना उधाण आले आहे. 

काँग्रेसचे आमदार कुणाल पाटील हे सलग दोन वेळा (Dhule News) धुळे ग्रामीण विधानसभा मतदार संघातून निवडून आले आहेत. तर आता आमदार कुणाल पाटील (Kunal Patil) यांना हॅट्रीकची संधी असल्यामुळे आणि महाविकास आघाडीमधील काँग्रेस पक्षाचे ते आमदार आहेत. परंतु आमदार कुणाल पाटील यांना येणाऱ्या विधानसभा निवडणुकीत महाविकास आघाडीकडून उमेदवारीचे तिकीट निश्चित मानले जात असले, तरी आगामी काळात काय चित्र असणार; हे येत्या काही दिवसात स्पष्ट होणार आहे. तरी देखील अशाप्रकारचे बॅनर लावण्यात आले आहे. 

शहरात ठिकठिकाणी बॅनर 

आमदार कुणाल पाटील यांच्या वाढदिवसानिमित्त शुभेच्छांचे हे बॅनर धुळे ग्रामीण व धुळे शहरात झळकले असून, अनेक बॅनरवर आमदार कुणाल पाटील यांचा भावी कॅबिनेट मंत्री असा उल्लेख करण्यात आला आहे. निवडणुकीपूर्वीच त्यांचे भावी कॅबिनेट मंत्री अशा आशयाचे बॅनर झळकले असून या बॅनरमुळे आता राजकीय चर्चांना उधाण आले आहे.