भूषण अहिरे, धुळे|ता. ९ ऑगस्ट २०२४

राज्यातील अपघातांचे सत्र काही थांबत नसल्याचे चित्र दिसत आहे. आज सकाळीच पालघरमध्ये एका कारने दुचाकीस्वाराला उडवल्याची घटना घडली. अशातच धुळे जिल्ह्यातून एक मोठी अपघाताची बातमी समोर आली आहे. ट्रॅक्टर आणि दुचाकीमध्ये हा भीषण अपघात झाला असून यामध्ये दोघांचा मृत्यू झाला आहे.

याबाबत सविस्तर माहिती अशी की, धुळे तालुक्यातील चित्तोड गावानजीक दुचाकी व ट्रॅक्टरचा अपघात झाल्याची घटना उघडकीस आली आहे. यामध्ये ट्रॅक्टर चालकाने दुचाकीवरील दोघांना चिरडल्याचे समोर आले असून या अपघातामध्ये दुचाकी वरील दोघेजण जागीच मृत्युमुखी पडले आहेत, तर एक जण जखमी झाला आहे.

या अपघाताची माहिती मिळताच स्थानिकांनी, तसेच तालुका पोलिसांनी घटनास्थळी धाव घेत जखमींना मदत केली. अपघातातील जखमीला शासकीय रुग्णालयामध्ये उपचारासाठी दाखल करण्यात आले आहे. तसेच तालुका पोलीस ठाण्यात या घटनेची नोंद करण्याचे काम सुरू असून, या घटनेमुळे परिसरात एकच हळहळ व्यक्त केली जात आहे.

दरम्यान, आज सकाळी पुणे-सोलापूर महामार्गावर धावत्या बसने पेट घेतल्याची घटना घडली. सोलापूर महामार्गावर कदमवाकवस्ती (ता. हवेली) ग्रामपंचायत हद्दीत ग्रँड हॉटेलच्या समोर धावत्या बसने पेट घेतल्याने सर्वांचीच तारांबळ उडाली. या घटनेत कोणतीही जीवितहानी झाली नसली तरी बसचे संपूर्ण नुकसान झाले आहे. या वेळी महामार्ग दोन्ही बाजुंनी बंद ठेवण्यात आला होता.