भूषण अहिरे, धुळे प्रतिनिधी

Truck Hits Bus, Maharashtra Highway Dhule Accident : मुंबई-आग्रा महामार्गावर बस आणि ट्रक यांचा भीषण अपघात झाला आहे. या अपघातात ८ वर्षाच्या चिमुकलीचा मृत्यू झाला आहे. तर इतर १५ प्रवासी जखमी झाले आहेत. आज सकाळी आठ वाजता धुळ्यातील दबाशी येथे हा अपघात झाला. अपघाताची माहिती मिळताच स्थानिकांनी तात्काळ घटनास्थळी धाव घेत मदतकार्य केले. जखमींना तात्काळ रूग्णालयात दाखल केले. अपघातानंतर काही काळ वाहतूक कोंडी झाली होती. पोलिसांनी अपघातग्रस्त वाहने बाजूला करत वाहतूक सुरळीत केली आहे.

शिरपूरहून शिंदखेड्याकडे जाणाऱ्या एसटी बसला आज सकाळी आठच्या सुमारास मुंबई-आग्रा महामार्गावरील दबाशी गावाजवळ भीषण अपघात झाला. भरधाव ट्रकने बसला समोरून दिलेल्या जोरदार धडकेत एका आठ वर्षीय चिमुकलीचा जागीच मृत्यू झाला. तर १५ प्रवासी जखमी झाले आहेत. जखमींना शिरपूर शासकीय रुग्णालयामध्ये उपचारासाठी दाखल करण्यात आले आहे तर आणखी तीन जखमींची प्रकृती चिंताजनक आहे. त्यांना इतर रूग्णालयात हलवण्यात आले आहे.

शिरपूर आगाराची बस प्रवाशांना घेऊन शिंदखेड्याच्या दिशेने जात होती. बस दाबाशी गावाजवळ आली असता, इंदोरकडे भरधाव वेगात निघालेल्या ट्रकने बसला समोरासमोर धडक दिली. ही धडक इतकी भीषण होती की बसच्या पुढील भागाचा अक्षरशः चक्काचूर झाला. अपघातानंतर बसमध्ये प्रवाशांचा आक्रोश आणि गोंधळ उडाला. अपघाताचा आवाज ऐकून स्थानिक ग्रामस्थ आणि इतर वाहनचालकांनी तात्काळ घटनास्थळी धाव घेतली. त्यांनी बसमध्ये अडकलेल्या जखमींना बाहेर काढून मदतकार्य सुरू केले. सर्व जखमींना तातडीने शिरपूर उपजिल्हा रुग्णालयात दाखल करण्यात आले. गंभीर जखमींना पुढील उपचारांसाठी शासकिय रुग्णालयात दाखल करण्यात आले आहे.