बालाजी सुरवसे 
धाराशिव : तुळजाभवानी देवीच्या मुख्य गाभाऱ्यातील शिखराबाबत निर्णय प्रक्रियेस आता चांगलाच वेग आला आहे. केंद्रीय पुरातत्व विभागाने गाभाऱ्यातील शिळाना गेलेले तडे आणि सद्यस्थितीच्या केलेल्या पाहणीचा अहवाल राज्य पुरातत्त्व विभागाकडे सोपवला आहे. याच अनुषंगाने लवकरात लवकर मुंबईत बैठक घेऊन तोडगा काढण्यासाठी राज्य पुरातत्त्व विभागाला जिल्हा प्रशासनाने घातली साद घातली आहे.

महाराष्ट्रातील साडेतीन शक्तिपीठांपैकी एक असलेल्या श्री तुळजाभवानी देवीचे मंदीर हेमाडपंथी धाटणीचं आहे. पुरातत्व खात्यानुसार हे मंदीर राष्ट्रकूट किंवा यादवकालीन असल्याचं मानले जाते. दरम्यान तुळजाभवानी मंदिराच्या गाभाऱ्यातील शिळांना तडे गेल्याचे समोर आले होते. याबाबत केंद्रीय पुरातत्व विभागाकडून पाहणी करण्यात आली होती. यासंबंधीचा अहवाल विभागाकडून तयार करण्यात आला आहे.   

मुंबईत लवकरच बैठक 

दरम्यान महाराष्ट्राची कुलस्वामिनी असलेल्या आई तुळजाभवानी देवी मंदिराच्या मुख्य शिखराबाबत अद्याप कुठलाही निर्णय झालेला नाही. मात्र लवकरच पुरातत्व विभागाच्या बैठकीत सकारात्मक निर्णयाची जिल्हा प्रशासनाला अपेक्षा आहे. दरम्यान केंद्रीय पुरातत्व विभागाकडून देण्यात आलेल्या अहवालनानंतर मुंबईत बैठक घेऊन तोडगा काढण्यासाठी राज्य पुरातत्त्व विभागाला जिल्हा प्रशासनाने साद घातली आहे. 

आई तुळजाभवानी देवीच्या मंदिराच्या मुख्य शिखर हटविण्याच्या सुरू असलेल्या चर्चांमध्ये आमदार जितेंद्र आव्हाड यांनी उडी घेतल्याने तुळजापुरात काल रात्री चांगलाच राडा झाला. राष्ट्रवादी काँग्रेस शरद पवार गटाचे आमदार जितेंद्र आव्हाड यांनी तुळजाभवानी देवीच्या मंदिराच्या शिखराला हात लावू न देण्याची भूमिका व्यक्त केल्यानंतर भाजप आणि आव्हाड समर्थकांमध्ये चांगलीच झटपट झाली. झटापट एवढी वाढली होती की पोलिसांना मध्यस्थी करत जितेंद्र आव्हाडांच्या गाडीला वाट करून द्यावी लागली. या सर्व हाय व्होल्टेज ड्राम्यानंतर जिल्हा प्रशासन ॲक्शन मोडवर आले आहे असून शिखरासंदर्भात लवकरच निर्णय होण्याची शक्यता आहे.