जालना येथील धनगर आंदोलक दीपक बोऱ्हाडे गेल्या ५ दिवसांपासून आमरण उपोषण करत आहेत. बोऱ्हाडे यांनी धनगर समाजाला ST प्रवर्गातून आरक्षण देण्याची मागणी केली आहे. आज उपोषणस्थळी भेट देण्यासाठी वकील गुणरत्न सदावर्ते आले होते आणि त्यांनी दीपक बोऱ्हाडेला पाठिंबा दर्शवला. यावेळी बोऱ्हाडे यांनी उपस्थितांना संबोधित करताना चिथावणीखोर वक्तव्य केले.

त्यांनी सांगितले की, माझा श्वास २४ तारखेपर्यंत सुरू राहील. २४ तारखेला धनगर समाजाचा इशारा मोर्चा आहे. या मोर्च्यानंतर देखील सरकारने खबरदारी घेतली नाही तर धनगर समाजाला फसवणाऱ्यांचे घर जाळून टाका. २४ तारखेनंतर नेपाळमध्ये जे झाले नाही, ते महाराष्ट्रात घडवा. बोऱ्हाडे यांच्या या वक्तव्यामुळे एकच खळबळ उडाली आहे.

गुणरत्न सदावर्ते यांच्यावर पुन्हा हल्ल्याचा प्रयत्न

वकील गुणरत्न सदावर्ते यांच्या गाडीवर मराठा आंदोलकांनी हल्ल्याचा प्रयत्न केला होता. त्यानंतर सदावर्ते यांनी मनोज जरांगे यांच्यावर हल्लाबोल करत जोरदार टीका केली होती.

त्यानंतर जालन्याहून परतत असताना पुन्हा मराठा आंदोलकांनी घोषणाबाजी देत काळे झेंडे दाखवले. जालना येथील मंठा दुसऱ्यांदा मराठा आंदोलकांनी सदावर्ते यांच्यावर हल्ल्याचा प्रयत्न केला.एक मराठा लाख मराठा अशा घोषणा आंदोलकांनी दिल्या.