पालकमंत्री धनंजय मुंडेंनी बीड जिल्ह्यातील पाणी टंचाई, खरीप हंगाम, बी-बियाण्यांची उपलब्धता यांसह विविध बाबींचा समग्र आढावा घेतलाय. जिल्ह्यात गेल्या दोन-चार दिवसात पावसाला सुरुवात झाली असून यावर्षी खरीप हंगामात 100 टक्के पेक्षा अधिक पाऊस होईल, अशी अपेक्षा त्यांनी व्यक्त केली आहे.

त्या दृष्टीने शेतकरी वर्ग कामाला लागला असून पहिल्या पेरणीसाठी कापूस, सोयाबीन सह खरीप हंगामातील विविध पिकांचे बी-बियाणे व आवश्यक खते जिल्हा कृषी विभागाच्या मार्फत बाजारात उपलब्ध करून देण्यात आली आहेत. तसेच वाढलेले खरीपाचे क्षेत्र लक्षात घेता बीड जिल्ह्यात कुठेही बी-बियाणांची किंवा खतांची कमतरता भासणार नाही, अशा दृष्टीने नियोजन करण्यात यावे, असे निर्देश राज्याचे कृषीमंत्री धनंजय मुंडे यांनी आज पार पडलेल्या बैठकीत बीड जिल्हा प्रशासनास दिले आहे.

जनावरांच्या चाऱ्याच्या उपलब्धी संदर्भात जरी मुबलक चारा सध्या उपलब्ध असला तरी छुप्या पद्धतीने जिल्ह्यातील चाऱ्याची बाहेर जिल्ह्यात विक्री केल्याच्या तक्रारी येत आहेत. यावर अंकुश लावावा तसेच बीड जिल्ह्यातील सर्व तालुक्यांमध्ये तात्काळ चारा डेपो कार्यान्वित करावेत, असे निर्देश देखील धनंजय मुंडे यांनी संबंधित अधिकाऱ्यांना दिले आहेत.

त्याचबरोबर काही कृषी निविष्ठा विक्रेते बी-बियाण्यांची चढ्या भावाने विक्री करत असल्याच्या तक्रारी येत आहेत. त्या प्रत्येक तक्रारीची दखल घेऊन त्याची शहानिशा करून संबंधितांवर कठोर कारवाई करावी, तसेच अशा पद्धतीची कारवाई न केल्यास राज्य शासन म्हणून संबंधित अधिकाऱ्यांवर आम्ही कारवाई करू, असा कडक इशारा यावेळी धनंजय मुंडे यांनी बैठकीत दिला आहे.