नागपूर : राज्यात नवीन स्थापन झालेल्या शिंदे-फडणवीस (Eknath Shinde) सरकारने विधानसभेत बहुमताचा आकडा गाठून आपलं सरकार मजबूत असल्याचं दाखवून दिलं. उपमुख्यमंत्रीपदाची शपथ घेतल्यानंतर देवेंद्र फडणवीस (Devendra Fadnavis) पहिल्यांदाच नागपूर शहरात पोहचले. यावेळी त्यांच्या समर्थकांसह भाजप कार्यकर्त्यांनी फडणवीसांचं नागपुरात जंगी स्वागत केलं. (Devendra Fadnavis Latest News)

पक्षासाठी देवेंद्र फडणवीस यांनी उपमुख्यमंत्रीपद स्वीकारल्याने त्यांच्यावर भाजपा नेत्यांकडून कौतुकाचा वर्षाव होत असतानाच नागपुरात स्वागतासाठी कार्यकर्त्यांनी तुफान गर्दी केली. राज्यात सत्ताबदल झाल्यानंतर देवेंद्र फडवणीस यांच्याकडे अनपेक्षितपणे उपमुख्यमंत्रीपद आलं आणि त्यानंतर आज पहिल्यांदाच ते नागपुरात दाखल झाले.

यावेळी कार्यकर्त्यांनी फडणवीसांचं जल्लोषात स्वागत केलं. यावेळी 'नागपूरकरांनी नेहमीच मला साथ दिली आहे. पाच वेळा मला आमदार केले आहे. दोन वेळ नगरसेवक म्हणून आणि महापौर म्हणून माझ्यावर विश्वास दाखवला आहे. आज पुन्हा मी उपमुख्यमंत्री म्हणून आलो तर तुमचे प्रेम कायम आहे. तुमचे मनापासून आभार मानतो', असे देवेंद्र फडणवीस म्हणाले. (Devendra Fadnavis News)

देवेंद्र फडणवीस यांचे आज सकाळी 11 वाजता नागपूर विमानतळावर आगमन झालं. यावेळी ढोल ताशाच्या निनादात त्यांचं स्वागत करण्यात आलं. विमानतळावर स्वागत केल्यानंतर देवेंद्र फडणवीस यांची रथात बसवून भव्य मिरवणुकही काढण्यात आले.

यावेळी त्यांच्यासोबत त्यांच्या पत्नी अमृता फडणवीस भाजप नेते चंद्रशेखर बावनकुळे यांची देखील उपस्थिती होती. देवेंद्र फडणवीस यांची धरमपेठ येथील त्यांच्या निवासस्थानी जाहीर सभा होणार आहे.

Edited By - Satish Daud