Deepak Kesarkar News: उद्धव बाळासाहेब ठाकरे शिवसेना पक्षाची आज जळगावात जाहीर सभा पार पडली. या सभेत उद्धव ठाकरे यांनी शिंदे गटावर जोरदार टीकास्त्र सोडलं. उद्धव ठाकरेंनी शिंदे गटावर केलेल्या टीकेवर मंत्री दीपक केसरकरांनी प्रत्युत्तर दिलं आहे. 'मला त्यांच्याबद्दल आदर आहे, पण प्रत्येक वेळी मतांचे राजकारण करून राज्याचा विकास करता येत नाही, असं म्हणत केसरकरांनी उद्धव ठाकरेंना चोख प्रत्युत्तर दिलं. (Latest Marathi News)

मंत्री दीपक केसरकरांनी पुण्यात प्रसारमाध्यमांशी संवाद साधला. यावेळी केसरकांनी उद्धव ठाकरेंनी केलेल्या टीकेचा समाचार घेतला. उद्धव ठाकरेंनी केलेल्या टीकेवर भाष्य करताना केसरकर म्हणाले, 'उद्धव ठाकरे (Uddhav Thackeray) यांनी विरोधी पक्षाचे म्हणून टीका करत राहावी, आम्ही विकासाचे काम करत राहू. आम्ही त्यांना पुन्हा पुन्हा सांगतोय, तुम्ही राष्ट्रवादी किंवा काँग्रेसच्या विचारांवर चालू नका'.

उद्धव ठाकरेंवर टीका करताना केसरकर पुढे म्हणाले, 'उद्धव ठाकरे यांना सडकून टीका करण्याची सवय आहे. मी त्यांच्यासोबत काम केलं आहे. जेव्हा समृद्धी महामार्ग होत होता, तेव्हा त्याला कसा त्यांनी विरोध केला हे आपण सर्वांनी पाहिलं. मेट्रोला त्यांनी कसा विरोध केला हे सर्वांनी पाहिलेला आहे. त्यांच्यामुळे जेव्हा प्रकल्प होतात तेव्हा त्याला विरोध करायचा आणि जेव्हा नंतर प्रकल्प होता तेव्हा ते प्रकल्प मीच केले असं म्हणायचं याला काही अर्थ नाही'.

' महाराष्ट्राचा जेव्हा विकास होत असतो, तेव्हा त्यात राजकारण असता कामा नाही. मला त्यांच्याबद्दल आदर आहे, पण प्रत्येकवेळी मतांचे राजकारण करून राज्याचा विकास करता येत नाही. सध्या त्यांना दिलेली भूमिका योग्य आहे. त्यांनी विरोधी पक्षाचे नेतृत्व करून टीका करत राहावं आम्ही महाराष्ट्राच्या हिताचं काम करत राहू, असेही दीपक केसरकर पुढे म्हणाले.