- अजय सोनवणे

Nashik News : नांदगाव तालुक्यात दुष्काळी परिस्थिती आहे. 36 पैसे आणेवारी लावली गेलेली असताना नांगदाव दुष्काळी तालुका जाहीर होत नसेल तर थेट न्यायालयात जावे लागेल असा इशारा आमदार सुहास कांदे यांनी (mla suhas kande) दिला आहे. (Maharashtra News)

नाशिक जिल्ह्यात यंदा पूर्व भागात पावसाने ओढ दिल्याने खरीप हंगामातील पिके हातची गेली आहेत. नांदगाव तालुक्यात जून ते सप्टेंबर दरम्यान इतर तालूक्याच्या तुलनेत केवळ 64.3 टक्के पाऊस झाल्याची नोंद झालेली असताना ट्रिगर 1 आणि 2 मध्ये नांदगाव तालुक्याचा समावेश झाला नाही.

त्यामुळे नांदगाव तालुक्याचे आमदार सुहास कांदे संतप्त झाले आहेत. तालुक्यात दुष्काळी परिस्थिती असूनही जर 36 पैसे आणेवारी लावली गेलेली असताना दुष्काळी तालुका जाहीर होत नसेल तर थेट न्यायालयात जाण्याचा इशारा आमदार कांदे यांनी दिला आहे.

आजी माजी पालकमंत्री यांचा मालेगाव व येवला तालुका ट्रीगर 2 मध्ये दाखविला जातो मग माझ्या मतदारसंघात कमी पाऊस होऊन तो ट्रिगर 1,ट्रिगर 2 मध्ये बसत नाही का असा सवाल आमदार कांदे (suhas kande) यांनी उपस्थित केला आहे.

शासनाने तालुका दुष्काळी जाहीर केला नाही तर न्यायालयात दाद मागू असा इशारा देत या अगोदर आपण मुख्यमंत्री, उपमुख्यमंत्री यांना भेटणार असल्याचेही त्यांनी स्पष्ट केले आहे.

Edited By : Siddharth Latkar