अकोल्यात 'किसान ब्रिगेड'च्या वतीने 'शेतकरी लूट वापसी संवाद सभा' पार पडली. ही सभा गाजली ती 'प्रहार'चे नेते बच्चू कडू आणि शेतकरी नेते रविकांत तुपकर यांच्या वादग्रस्त विधानांनी. या सभेसाठी देश आणि राज्यातील शेतकरी नेते अकोल्यात आले होते. भारतीय किसान युनियनचे नेते राकेश टिकैत, बच्चू कडू, रविकांत तूपकर, प्रकाश पोहरे, अजित नवले, विश्वास उटगी आदी नेते या सभेला उपस्थित होतेय.

या सभेत बोलताना 'प्रहार'चे नेते बच्चू कडू यांनी त्यांच्या नुकत्याच झालेल्या जळगाव येथील आंदोलनानंतर दाखल झालेल्या गुन्ह्यांचा उल्लेख केला. "जळगावातील आंदोलनात आम्ही फक्त जिल्हाधिकारी कार्यालयाचे गेट तोडलं. यानंतर राज्यात होणाऱ्या आंदोलनात आम्ही आता थेट कलेक्टरलाच तोडू " असा वादग्रस्त इशारा बच्चू कडू यांनी दिला.

याच सभेत बोलताना शेतकरी नेते रविकांत तुपकरांनी थेट 'जेन-झी' आंदोलनादरम्यान नेपाळमधील घटनेचा उल्लेख केला. "यानंतर शेतकऱ्यांना न्याय मिळविण्यासाठी थेट मंत्र्यांना तुडवावं लागेल.‌ दोन-चार मंत्र्यांना तुडवल्याशिवाय व्यवस्था जागी होणार नाही" असं वादग्रस्त विधान रविकांत तुपकरांनी केलं. तर, 'भारतीय किसान युनियन'चे नेते राकेश टिकैत यांनी शेतकऱ्यांना आपल्या जमिनी विकू नका असं आवाहन केलं आहे. अकोल्यातील बच्चू कडू आणि रविकांत तुपकर यांच्या विधानांनी राज्यात नवा वाद निर्माण होण्याची शक्यता आहे.

या सभेतील वादग्रस्त विधानांनी राज्यात नव्या चर्चांना तोंड फोडले आहे. विशेषतः बच्चू कडू आणि रविकांत तुपकर यांच्या भाषणातील आक्रमक शब्दप्रयोगामुळे राजकीय वर्तुळात टीकेची झोड उठली आहे. दरम्यान या आंदोलनानंतर शेतकरी प्रश्नांकडे सरकारने दुर्लक्ष केल्यास राज्यात आणखी तीव्र आंदोलन पेट घेण्याची शक्यता नाकारता येणार नाही.