Baba Siddique

काँग्रेस पक्ष सोडू नये असं काँग्रेसच्या वरिष्ठ नेत्यांचं म्हणणं होतं. पण आपलं जमत नाही तिथे कशाला थांबायचं. मतभेद झाले तिथंच ठरवलं होतं की पक्षातून निघायचं. पक्ष सोडून जाताना दुःख होतं, पण पर्याय नसल्याची खंत आज बाबा सिद्दीकी यांनी अजित पवार गटात प्रवेश करताना बोलून दाखवली. अजित पवार गटाच्या प्रमुख नेत्यांच्या उपस्थितीत त्यांचं जंगी स्वागत करण्यात आलं.

बाबा सिद्दिकी यांनी याच आठवड्यात काँग्रेसला रामराम ठोकत मोठा धक्का दिला होता. त्यानंतर ते राष्ट्रवादी काँग्रेसच्या अजित पवार गटात प्रवेश करणार असल्याची चर्चा होती. १० फेब्रुवारी रोजी म्हणजे आज त्यांचा प्रवेश निश्चित मानला जात होता. अपेक्षेप्रमाणे आज त्यांनी उजित पवार गटाच्या नेत्यांच्या उपस्थित प्रवेश केला.

बाबा सिद्धिकी यांच्या पक्ष प्रवेश कार्यक्रमाला प्रफुल पटेल, सुनिल तटकरे, धनंजय मुंडे, हसन मुश्रिफ, आदिती तटकरे यांच्यासह अजित पवार गटाचे पदाधिकारी आणि कार्यकर्ते मोठ्या संख्येने उपस्थित होते. दरम्यान कार्यक्रमस्थळी अजित पवार यांचं आगमन होताचं जेसीबीने फुलांचा वर्षाव करून त्यांचं स्वागत करण्यात आलं.

(साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

मिलिंद देवरा यांनी काँग्रेससोबतच्या राजकीय (Maharashtra Politics) प्रवासाला 'विराम' दिल्यानंतर मुंबईतील आणखी एक बडा नेता काँग्रेसचा हात सोडणार असल्याची चर्चा होती. बाबा सिद्दीकी आणि त्यांचे पुत्र आमदार झिशान सिद्दीकी हे काँग्रेसचा राजीनामा देण्याची शक्यता व्यक्त केली जात होती. त्यावेळी बाबा सिद्दीकी यांनी या वृत्ताचं खंडन केलं होतं.

मी आजही काँग्रेससोबत आहे आणि भविष्याचं काही सांगता येणार नाही, असं ठणकावून सांगितलं होतं. मात्र, त्याच्या काही दिवसांनंतरच बाबा सिद्दीकी यांनी स्वतः सोशल मीडियावर पोस्ट करून आपण काँग्रेसच्या सदस्यत्वाचा राजीनामा देत आहे, असं जाहीर केलं.

मी तरूणपणातच काँग्रेसशी जोडलो गेलो होतो. मागील ४८ वर्षांचा प्रवास माझ्यासाठी अत्यंत महत्वाचा होता. आज तात्काळ प्रभावाने मी काँग्रेसच्या प्राथमिक सदस्यत्वाचा राजीनामा देत आहे. मला खूप काही बोलायचं होतं, पण काही गोष्टी न बोललेल्याच उत्तम असतात. माझ्या प्रवासात ज्यांनी साथ दिली त्या सर्वांचे मी आभार मानतो, अशी पोस्ट बाबा सिद्दीकी यांनी एक्सवर लिहिलं होतं.