अमर घटारे, साम टीव्ही

आगामी निडवणुकीसाठी सर्व राजकीय पक्षांनी आतापासून मोर्चेबांधणी करण्यास सुरुवात केली आहे. विधानपरिषदेच्या निवडणुकीदरम्यान बच्चू कडू यांनी शिवसेनेत प्रवेश केला. त्यानंतर आता अमरावतीमधील आणखी एक नेता शिंदे गटात प्रवेश करणार असल्याचे निश्चित झालं आहे. अमरावतीच्या दर्यापुरातील काँग्रेस नेते सुधाकार भारसाकळे हे शेकडो कार्यकर्त्यांना घेऊन शिंदे गटात प्रवेश करणार आहेत. भारसाकळे शिवसेनेत पक्ष प्रवेश करणार असल्याने काँग्रेसला मोठा धक्का बसणार आहे.

अमरावतीत राजकीय घडामोडींना वेग आला आहे. अमरावतीमधील सहकार नेते आणि काँग्रेसचे माजी दर्यापूरचे तालुकाध्यक्ष सुधाकर भारसाकळे यांनी आज मंगळवारी कार्यकर्ता मेळावा आयोजित केला. या कार्यकर्ता मेळाव्यात सुधाकर भारसाकडे यांनी शिंदे गटात प्रवेश करणार असल्याचे स्पष्ट संकेत दिलेत. उपमुख्यमंत्री एकनाथ शिंदे आणि बच्चू कडू यांच्या उपस्थितीत सुधाकर भारसाकडे हे समर्थकांसह शिंदे सेनेत पक्षप्रवेश करणार आहेत. सुधाकर भारसाकडे यांच्या कार्यकर्ता मेळावात काँग्रेसचे अनेक पदाधिकारी उपस्थित होते.

या मेळाव्यात सुधाकर भारसाकळे म्हणाले, 'मी नवी वाट शोधली आहे. त्या वाटेने मला जायचं आहे. तुम्ही त्यासाठी माझ्यासोबत राहाल. एवढीच मी अपेक्षा व्यक्त करतो. लवकरच म्हणजे दोन-तीन दिवसांत एकनाथ शिंदे यांच्या शिवसेनेत प्रवेश करणार आहे. दबंग नेतृत्व बच्चू कडू हे सोबत राहणार आहेत. त्यांच्या माध्यमातून तुमच्या साक्षीने शिवसेनेत प्रवेश करणार आहेत. तुम्ही मला आशीर्वाद द्याल. मला ताकद द्याल. काँग्रेसला मोठं केलं, त्या पद्धतीने शिवसेनेलाही पुढे नेऊ'.

'तुम्हा सर्वांचे आभार व्यक्त करतो. इतक्या ऊन्हातही मेळाव्याला उपस्थित राहिलात. माझ्यावर प्रेम दाखवलं. माझ्यावरील प्रेम सदैव राहावं. तुम्हाला चुकीच्या वाटेवर घेऊन जाणार नाही. ही तुम्हाला ग्वाही देतो, असे भारसाकळे यांनी सांगितले.