मुंबई : 'शिंदे-फडणवीस' सरकार (Maharashtra Government) उद्या होणाऱ्या बहुमत चाचणीच्या परीक्षेतही (floor test) पास होईल, अशी चर्चा राजकीय वर्तुळात रंगल्याने मविआ नेत्यांच्या भुवया उंचावल्या आहेत. या सर्व घडामोडींबाबत मुख्यमंत्री एकनाथ शिंदे (Eknath Shinde) यांनी ताज प्रेसिडेंट हॉटेलमध्ये राज्य सरकारमधील सर्व आमदारांना मार्गदर्शन केले. आज पार पडलेल्या अध्यक्षपदाच्या निवडणुकीप्रमाणे उद्या होणाऱ्या बहुमत चाचणीमध्येही आपलं सरकार नक्की यशस्वी ठरेल, असा विश्वास शिंदे यांनी व्यक्त केला.

मिळालेल्या माहितीनुसार, विधिमंडळाच्या विशेष अधिवेशनाच्या उद्या दुसऱ्या दिवशी शिवसेना-भाजप युती सरकारला बहुमताच्या चाचणीला सामोरे जायचे आहे. या पार्श्वभूमीवर शिंदे-फडणवीस सरकारमध्ये उद्याची रणनीती आखण्यासाठी बैठक झाली. योवेळी बहुमत चाचणीला सामोरं जाण्यासाठी आमदारांसोबत मुख्यमंत्री एखनाथ शिंदे यांनी चर्चा केली.

यावेळी आमदारांना मार्गदर्शन करताना शिंदे म्हणाले, आज पार पडलेल्या अध्यक्षपदाच्या निवडणुकीप्रमाणे उद्या होणाऱ्या बहुमत चाचणीमध्येही आपलं सरकार नक्की यशस्वी ठरेल. दरम्यान, या बैठकीत उपमुख्यमंत्री देवेंद्र फडणवीस, भाजप प्रदेशाध्यक्ष चंद्रकांत पाटील,शिवसेनेचे प्रतोद भरतशेठ गोगावले,आमदार दीपक केसरकर,आमदार सुधीर मुनगंटीवार,आमदार प्रवीण दरेकर आणि शिवसेना-भाजप युतीचे तसेच सहयोगी पक्षांचे आमदार उपस्थित होते.

विधानसभेच्या दोन दिवसीय विशेष अधिवेशनाला आजपासून सुरुवात झाली आहे. या अधिवेशनात विश्वासदर्शक ठराव आणि विधानसभा अध्यक्षांची निवड झाली. अध्यक्षपदासाठी भाजपचे राहुल नार्वेकर आणि शिवसेनेचे राजन साळवी राजकीय मैदानात उतरले होते. विधानसभा सदस्यांची मतदान प्रकिया पार पडल्यानंतर भाजप उमेदवार राहुल नार्वेकर यांना १६४ मताधिक्य मिळाल्याने त्यांचा विजय झाला. याच पार्श्वभूमीवर महाविकास आघाडीच्या नेत्यांनी टीका-टीप्पणी केली.

Edited By - Naresh Shende