सध्या राज्यात साताऱ्यातील फलटण येथील प्रकरण प्रचंड तापलंय. डॉक्टर तरूणीनं शहरातील नामांकित हॉटेलमध्ये गळफास घेऊन आयुष्य संपवलं. आत्महत्या करण्यापूर्वी डॉक्टर तरूणीनं तळहातावर सुसाईड नोट लिहिली आणि आयुष्याचा दोर कापला. या प्रकरणात आता वेगवेगळे मुद्दे आणि खुलासे उघडकीस येत आहे. काल आरोपी प्रशांत बनकरला पोलिसांनी ताब्यात घेतलं होतं. तर, पोलीस उपनिरीक्षक गोपाळ बदने यांनी शनिवारी रात्री पोलीस ठाण्यात जाऊन आत्मसमर्पण केलं.

सध्या दोन्ही आरोपींची कसून चौकशी सुरू आहे. दोन्ही आरोपींना कोर्टात हजर केले जाणार आहे. या प्रकरणी मुख्यमंत्री देवेंद्र फडणवीस यांनी 'कुणालाही सोडले जाणार नाही. जे कुणी या प्रकरणात सामील असतील त्यांना कठोरातील कठोर शिक्षा देण्यात येईल', असं म्हटलं होतं. दरम्यान आज मुख्यमंत्री फलटण दौऱ्यावर आहेत. फलटण दौऱ्याआधी डॉक्टर तरूणी आत्महत्या प्रकरणात दोन्ही आरोपींना बेड्या ठोकल्या आहेत. या प्रकरणाला आता वेग आला असल्याचं पाहायला मिळत आहे.

दरम्यान, महाराष्ट्राचे मुख्यमंत्री देवेंद्र फडणवीस आज फलटण येथे आयोजित कृतज्ञता मेळाव्यास उपस्थित राहणार आहेत. या मेळाव्यात फलटण शहर आणि परिसरातील विविध विकासकामांचे ऑनलाईन भूमिपूजन करण्यात येणार आहे. या कार्यक्रमासाठी राज्याचे सार्वजनिक बांधकाम मंत्री शिवेंद्रसिंह राजे भोसले, ग्रामविकास मंत्री जयकुमार गोरे तसेच पर्यटन मंत्री शंभूराज देसाई हे देखील उपस्थित राहणार आहेत.

गेल्या दोन दिवसांपासून फलटणमध्ये डॉक्टर महिला आत्महत्येच्या प्रकरणाने सर्वत्र खळबळ उडालेली आहे. अशा पार्श्वभूमीवर मुख्यमंत्री देवेंद्र फडणवीस यांच्या फलटण दौऱ्याकडे सर्वांचेच लक्ष वेधले गेले आहे. या प्रकरणी मुख्यमंत्री देवेंद्र फडणवीस नेमकं काय बोलतात? याकडे सध्या लक्ष आहे.