नागपूर : नागपूरच्या लकडगंज पोलिसांनी एक मोठी कारवाई करत बनावट सिगारेट्स आणि नायलॉन मांजा जप्त केला आहे. हा सगळा माल अवैधरित्या विक्रीसाठी नागपुरात ट्रान्सपोर्टच्या माध्यमातून आणण्यात आला होता. या प्रकरणी पोलिसांनी 17 लाखाच्या मुद्देमाल सोबत एजेंटला अटक केली तर दिल्लीच्या ट्रान्स्पोर्टर वर देखील गुन्हा दाखल केला आहे.

हे देखील पहा-

नागपुरामध्ये (Nagpur) अवैध मार्गाने बनावट सिगारेट (Cigarettes) आणि बंदी असलेला घातक असा नायलॉन मांजा (nylon Manja) ट्रान्सपोर्टच्या माध्यमातून येत असल्याची गुप्त माहिती पोलिसांना (Police) मिळाली होती. पोलिसांनी यावर पाळत ठेवली असता एक ट्रक संशयास्पद अवस्थेत दिसला. पोलिसांनी ट्रकची पाहणी केली असता त्यात १३० मांजाच्या चक्री आढळल्या पोलिसांनी त्या जप्त केल्या. सोबतच २०० सिगारेटसचे पाकिट देखील जप्त करण्यात आले आहेत.

या सिगारेटस् ची किंमत ६ लाख, ५० हजार रुपये आहे. विशेष म्हणजे, सिगारेटसच्या पाकिटवर कोणत्याही प्रकारचा वैधानिक इशारा लिहिलेला नाही. पोलिसांनी हा ७ लाख, १५ हजारांचा मुद्देमाल तसेच १० लाख, ५० हजारांचा ट्रक असा एकूण १७ लाख, ६५ हजारांचा मुद्देमाल जप्त अरण्यात आला आहे. नागपुरात गेल्या काही दिवसांपासून मोठ्या प्रमाणात नायलॉन मांजावर कारवाई सुरू आहे. मात्र या कारवाईत सिगारेट सुद्धा मिळून आल्याने या अवैध धंद्यांचे तार नेमके कुठपर्यंत पोहचले आहे याचा शोध पोलीस करत आहेत.

Edited By- Digambar Jadhav