छत्तीसगडमधील दुर्ग जिल्ह्यातील भिलाई येथे प्रेमप्रकरणातून तरूणाची हत्या करण्यात आली आहे. घटनेच्या दिवशी तरूण प्रेयसीला भेटण्यासाठी तिच्या घरी गेला होता. भावांनी बहिणीला आणि तिच्या प्रियकराला रंगेहाथ पकडलं. भावांनी तरूणाला पकडून निर्घृणपणे हत्या केली. या घटनेनंतर पोलिसांनी तीन आरोपींना ताब्यात घेतलं आहे. तर, इतर फरार दोन आरोपींचा शोध सुरू आहे. या घटनेनंतर परिसरात खळबळ उडाली आहे.

धीरज सरोज उर्फ विक्की (वय वर्ष २५) असे मृत तरूणाचे नाव आहे. पोलिसांनी दिलेल्या माहितीनुसार, धीरजचे परिसरात राहणाऱ्या तरूणीशी प्रेमसंबंध होते. घटनेच्या दिवशी महिलेची आई घराबाहेर गेली होती. तर, तिचा भाऊ सूरज कामावर होता. दरम्यान, धीरज त्याच्या प्रेयसीला भेटण्यासाठी घरी गेला. युवतीनं त्याला थाबंवले. पण तो घरी गेला.

काही वेळाने तरूणीचा भाऊ सूरज अचानक घरी परतला. दोघांना एकत्र पाहून भाऊ संतापला. त्यानं चुलत भावांना बोलावून घेतलं. तसेच दरवाजा बंद करून धीरजला बेदम मारहाण केली. डोक्याला गंभीर दुखापत झाल्यानं त्याचा जागीच मृत्यू झाला.

मृत तरूणाची आई शोभा यांनी आरोप केला की, तरूणीनं धीरजला घरी बोलावून घेतलं. नंतर तरूणीच्या भावांनी धीरजची हत्या केली. पोहोचल्यानंतर धीरज रक्ताच्या थारोळ्यात पडला होता, अशी माहितीही तरूणाच्या आईनं दिली. पोलीस हेम प्रकाश नायक म्हणाले की, 'धीरजची निर्घृण हत्या करण्यात आली. ५ संशयितांची ओळख पटली आहे. तिघांना अटक करण्यात आली आहे. दोघे फरार आहेत. तरूण मुलीला भेटण्यासाठी घरी गेला होता. मुलीच्या भावांनी धीरजवर हल्ला केला, यामुळे त्याचा मृत्यू झाला', अशी माहिती त्यांनी दिली.