माधव सावरगावे, साम टीव्ही, प्रतिनिधी

छत्रपती संभाजीनगर : नातलगाला भेटण्यासाठी गावी आलेल्या एका तीस वर्षीय तरुणावर चांगलाच प्रसंग ओढावला. या तरुणाच्या मागे गावतले कुत्रे लागले. पळ काढल्यानंतर हा तरुण विहिरीमध्ये जाऊन पडला. विहिरीमध्ये दोन दिवस आणि दोन रात्री एका दोरीला लटकून राहिला. तिसऱ्या दिवशी त्याचा आवाज त्याला विहिरीतून बाहेर काढण्यात आले.

मिळालेल्या माहितीनुसार, जालना येथून छत्रपती संभाजीनगर जिल्ह्यातील पिशोर गावात नातेवाईकांना भेटण्यासाठी एक तीस वर्षीय तरुण पोहोचला होता. गावात प्रवेश करताच त्याच्यामागे मोकाट कुत्रे लागले. कुत्र्यांपासून स्वत:चा बचाव करण्यासाठी तरुणाने पळ काढला खरा पण तो चुकून एका खोल भूमिगत विहिरीमध्ये जाऊन पडला.

पीडित तरुण विहिरीला लागून असलेल्या दोरीला धरुन राहिला. विहिरीमध्ये लटकत त्याने दोन दिवस आणि दोन रात्री उपाशी राहून काढल्या. या कालावधीमध्ये तो मदतीसाठी अनेकदा आरडाओरड करत होता पण विहीर निर्मनुष्य ठिकाणी असल्याने त्याच्या मदतीला कुणी आले नाही. याशिवाय विहीर खूप खोल असल्याने त्याचा आवाज बाहेर पोहोचला नाही.

विहिरीच्या दोरीला लटकून तरुणाने दोन दिवस कसेबसे काढले. शेवटी तिसऱ्या दिवशी मोहोळ शोधण्यासाठी काहीजण त्या निर्मनुष्य ठिकाणी आले. त्यांना तरुणाचा आवाज आला. पुढे गावकरी आणि पोलिसांच्या मदतीने त्या तरुणाला सुखरुप बाहेर काढण्यात यश आले. संदीप घटकवडे असे विहिरीमध्ये पडलेल्या तरुणाचे नाव आहे.