Crime News : आयुष्यभर सोबत राहायच्या आणाभाका, कुटुंबीयांचा विरोध झुगारून लग्नगाठ बांधली; अवघ्या २ वर्षात संसाराची राखरांगोळी

सागर आव्हाड, साम टीव्ही, प्रतिनिधी

पुण्यातील रहिवासी असणाऱ्या गौरी सांबेकर या तरुणीची तिच्याच पतीने राकेश खेडेकरने बंगळुरूमध्ये हत्या केली. घरगुती वादात रागाच्या भरात राकेशने गौरीवर चाकूने वार केले. यामुळे गौरीचा मृत्यू झाला. हत्येनंतर राकेशने गौरीच्या मृतदेहाचे तुकडे केले आणि एका सुटकेसमध्ये भरुन ठेवले. त्यानंतर राकेशने त्याच्या वडिलांना फोन करुन गुन्ह्याची कबुली दिली.

राकेशने गौरीची हत्या केल्याची कबुली फोनवरुन दिल्याची माहिती त्याच्या वडिलांनी, राजेंद्र खेडेकर यांनी दिली. ते म्हणाले, हत्या केल्यानंतर रात्री बारा वाजता माझा मुलगा बंगळुरूहूनc निघाला. दुसऱ्या दिवशी दुपारी त्याने कॉल करुन गुन्ह्याची कबुली दिली. मला जगायचं नाही, मी सुद्धा आत्महत्या करेन असे तो म्हणाला होता. मी त्याला तसं करु नकोस असे सांगितले होते.

'गौरीची आई माझी सख्खी बहीण आहे, गौरी माझी सख्खी भाची आहे. ती वाद घातले हे आम्हाला आधीपासूनच माहीत होते. दोघांनी लग्न करुच नये म्हणून आम्ही चार वर्षे थांबलो होतो. पण ते दोघेही एकमेकांशी लग्न करण्यावर आडून बसले होते. लग्न करु तर एकमेकांशीच करु, नाहीतर लग्नच करणार नाही अशी भूमिका त्यांनी घेतली होती. त्यामुळे आम्ही त्याच्यांसमोर गुडघे टेकले आणि त्याचे लग्न लावून दिले', अशी माहिती राजेंद्र खेडेकर यांनी दिली.

नेमकं काय घडलं?

बंगळुरूला शिफ्ट झाल्यानंतर राकेश आणि गौरी यांच्यामध्ये अनेकदा वाद झाले होते. पण हा वाद शिगेला पोहोचून राकेशने गौरीवर चाकूने वार करत तिची हत्या केली. हत्येनंतर तिच्या मृतदेहाचे तुकडे करुन सुटकेसमध्ये भरले. खासगी वाहनाने तो बंगळुरूवरुन मुंबईला येत होता. रस्त्यातच राकेशने झुरळ मारण्याचे औषध आणि फिनेल प्यायले. त्यामुळे तो शिरवळच्या आसपास बेशुद्ध झाला. त्यानंतर पोलिसांनी त्याला ताब्यात घेतले.