छत्रपती संभाजीनगरचे पालकमंत्री आणि शिवसेना शिंदे गटाचे आमदार अब्दुल सत्तार यांच्याविरोधात पुन्हा भाजप पदाधिकारी आक्रमक झाले आहेत. सत्तारांना घेण्यासाठी भाजपकडून आज सिल्लोडमध्ये मोर्चा काढला जाणार आहे. या मोर्चामध्ये स्थानिक पदाधिकारी तसेच कार्यकर्ते मोठ्या संख्येने सहभागी होणार आहे. यापार्श्वभूमीवर आज सोमवारी सिल्लोड बंदची हाक देण्यात आली आहे.

विधानसभा निवडणुकीपूर्वी सिल्लोड-सोयगाव मतदारसंघात शिवसेनेचे मंत्री अब्दुल सत्तार आणि भारतीय जनता पक्ष यांच्यातील संघर्ष अधिकच तीव्र होत चालला आहे. भाजपचे नेते तसेच पदाधिकारी सत्तार यांच्यावर सातत्याने टीका करीत आहेत. त्यामुळे तालुक्यातील राजकीय वातावरण चांगलंच तापलं आहे.

पंधरा दिवसांपूर्वी शिवना येथील प्रकरणावरून माजी केंद्रीय मंत्री रावसाहेब दानवे यांच्या मार्गदर्शनाखाली भाजपने अजिंठा येथे रास्ता रोको आंदोलन केले होते. यावेळी दानवे यांनी सत्तारांवर चांगलेच तोडसुख घेतले होते. पोलिसांच्या बळाचा वापर करून शिवना येथे घडलेल्या घटनेत सत्तारांनी जाणीवपूर्वक भाजप कार्यकर्त्यांवर गुन्हे दाखल केल्याचा आरोप दानवे यांनी केला.

इतकंच नाही, तर अब्दुल सत्तार यांच्यामुळे सिल्लोडचा पाकिस्तान होतोय, अशी जहरी टीका देखील रावसाहेब दानवे यांनी केली होती.आता सत्तार यांच्या निषेधार्थ भाजपच्या वतीने पुन्हा सिल्लोडमध्ये मोर्चा काढला जाणार आहे. तहसील कार्यालयासमोर मोर्चाचे रूपांतर सभेत होणार आहे. या मोर्चामध्ये विविध पक्ष संघटना तसेच भाजपचे स्थानिक कार्यकर्ते आणि पदाधिकारी सहभागी होणार आहे.

यापार्श्वभूमीवर सिल्लोड बंदची हाक देण्यात आली होती. मात्र, महिनाभरात तीन वेळा बाजारपेठ बंद ठेवावी लागत असल्याने व्यापाऱ्यांचे मोठे नुकसान होत आहे. त्यामुळे बंदचा निर्णय मागे घेण्यात आला आहे. तरी देखील भाजपकडून सिल्लोडमध्ये मोर्चा काढला जाणार असल्याची माहिती पदाधिकाऱ्यांनी दिली आहे.