Chhatrapati Sambhajinagar News: छत्रपती संभाजीनगरच्या वैजापूरमध्ये सद्गुरु गंगागिरी महाराज यांच्या 176 व्या अखंड हरिनाम सप्ताहास लाखो भाविकांच्या उपस्थितीत भक्तिभावात सुरुवात झाली. विशेष म्हणजे शतकीय वर्षे परंपरा असलेला गंगागिरी महाराज यांचा अखंडपणे सुरू असलेला हा सप्ताह जगातील आणखी एक आश्चर्यच आहे. त्यामुळेच या सप्ताहाची थेट गिनीज बुकात नोंद करण्यात आली आहे..

याबाबत अधिक माहिती अशी की, सद्गुरु गंगागिरी महाराज यांच्या 176 व्या अखंड हरिनाम सप्ताहाची सुरवात झाली आहे. या सप्ताहाची परंपरा मोठी आहे. एकूण 200 एकरमध्ये होणाऱ्या या सप्ताहात तब्बल 168 तास अखंडपणे हरिनाम जप आणि भजन सुरू आहे. यासाठी संभाजीनगर, अहमदनगर आणि नाशिक जिल्ह्यासह राज्यभरातील लाखो भाविक येथे दाखल झाले आहेत.

सप्ताहासाठी एकूण 200 एकर जागेत 200 बाय 300 चौमीचा भव्य हरिनाम जप प्रहर मंडप उभारला आहे. या ठिकाणी 10 ते 12 हजार प्रहरी आठ-आठ तासाच्या तीन प्रहरात 168 तास अखंड हरिनाम जप आणि भजन सुरू आहे. हा ऐतिहासिक सोहळा अनुभवायला लाखो भाविक दाखल झाले आहेत. भाविकांसाठी 300 चौरस मीटर जागेवर दररोजच्या महाप्रसादासाठी भव्य प्रसादालय उभारण्यात आले आहे.

उपस्थित भाविकांना पूरणपोळ्या आणि मांडेचा प्रसाद देण्यात येतो. तर एकादशीच्या दिवशी 250 ते 300 क्विंटल साबुदाना, 50 क्विंटल भगर असे फराळ भाविकांना वाटण्यात येणार आहे. इतक्या लोकांच्या प्रसादासाठीची तयारीही तितकीच मोठी आहे.

सकाळी सात वाजता या स्वयपाकांला सुरूवात होते. प्रसादासाठी दररोज शंभर गावे आपली ट्रॅक्टर घेऊन गावातून वाजत गाजत मिरवणूक काढत सप्ताहाच्या ठिकाणी भाकरी आणतात. (Latest Marathi News)