छत्रपती संभाजीनगरमध्ये एका माथेफिरू तरुणाने मजुराला भररस्त्यात अडवलं. त्यानंतर २२ सेकंदात तब्बल २२ जीवघेणे वार करत त्याची अत्यंत निर्घृणपणे हत्या केली. थरकाप उडवणारी ही घटना शहरातील उस्मानपुरा भागात सोमवारी रात्रीच्या सुमारास घडली. हा सर्व प्रकार सीसीटीव्हीत कैद झाला. याप्रकरणी उस्मानपुरा पोलिसांनी आरोपीला अटक करून खुनाचा गुन्हा दाखल केला आहे.

या घटनेनं शहरातील नागरिकांमध्ये भितीचं वातावरण निर्माण झालं आहे. अशोक दादाराव शिनगारे, असं मृत मजुराचे नाव असून निखिल शिंगाडे असे माथेफिरू तरुणाचे नाव आहे. पोलिसांनी दिलेल्या माहितीनुसार, मृत आणि आरोपी हे एकाच परिसरात राहतात. आरोपी निखिल शिंगाडे हा गेल्या ६ महिन्यांपासून कोमात होता.

डॉक्टरांच्या उपचारानंतर नुकताच तो कोमातून बाहेर आला होता. मंगळवारी मृत अशोक शिनगारे हे पहाटे ५ वाजता फिरायला जाण्यासाठी घराबाहेर पडले होते. मॉर्निंग वॉक करीत असताना त्यांच्या ओळखीचा निखिल शिंगाडे, प्रज्योत शिंगाडे आणि अक्षय गायकवाड हे बोलत थांबले असताना अचानक निखिलने चाकूने यांच्यावर हल्ला केला.

आरोपीने शिनगारे यांच्या पाठीवर, मानेवर, तोंडावर धारदार शस्त्राने २२ सेकंदात तब्बल २२ वेळा सपासप वार केले. धक्कादायक बाब म्हणजे, शिनगारे खाली कोसळल्यानंतर देखील आरोपी वार करीत होता. चाकूने हल्ला केल्यानंतर तेथे उभे असलेले प्रज्योत आणि अक्षयने घाबरून पळ काढला.

हल्ला केल्यानंतर संशयित आरोपी निखिल शांततेत तेथून निघून गेला. मोठा रक्तस्त्राव झाल्याने शिनगारे यांचा जागीच मृत्यू झाला. हत्येचा हा थरार परिसरातील सीसीटीव्ही कॅमेऱ्यात कैद झाला आहे. या हल्ल्यामागचं कारण मात्र समजू शकले नाही. याप्रकरणी पोलिसांनी गुन्हा दाखल करत आरोपीला तातडीने अटक केली आहे.

Edited by - Satish Daud