माधव सावरगावे, साम टिव्ही

छत्रपती संभाजीनगर : छत्रपती संभाजीनगरमध्ये एक हृदयद्रावक घटना घडलेली आहे. साचलेल्या पाण्यात बुडून दोन चिमुरड्यांचा दुर्दैवी अंत झाला आहे. जिल्ह्यातील मोढा बुद्रूक शिवारात ही घटना घडली आहे. साचलेल्या पाण्यात बुडून सख्या बहीण आणि भावाचा मृत्यू झाल्याची घटना आज दुपारी ३ वाजेच्या सुमारास मोढा बुद्रूक शिवारात घडली.

मोढा बुद्रूक शिवारातील गट क्रमांक १७२ मधील शेतात ऊसतोड कामगार गणेश कांबळे राहतात. दोन दिवसांपासून पावसाचा जोर असल्यामुळे शेतशिवारात पाणी साचलेलं आहे. दुपारी गणेश कांबळे यांची मुलगी हर्षदा गणेश कांबळे (वय ६ वर्ष) आणि मुलगा रुद्र गणेश कांबळे (वय अडीच वर्ष) दोघे घराजवळील साचलेल्या डबक्याच्या पाण्याजवळ गेले. दोघांचा या पाण्यात बुडून मृत्यू झाला. गणेश कांबळे मजुरी करून पोट भरतात. दोन्ही लेकरांचा मृत्यू झाल्याने त्यांच्या परिवारावर मोठा आघात झाला. चिमुरड्यांचा मृतदेह शहरातील घाटी रुग्णालयात आणण्यात आला होता.

इमारतीवरुन पडून तरुणीचा मृत्यू

दरम्यान, रायगड जिल्ह्यातील महाड शहरात एक धक्कादायक घटना समोर आली आहे. चार मजली इमारतीच्या टेरेसवरून पडून २० वर्षीय तरुणीचा मृत्यू झाल्याची दुर्दैवी घटना घडलीय. महाड शहरातील काकर तळे येथे हे घडली आहे. रिया किशोर चौधरी असं या तरुणीचं नाव आहे. ती राहत असलेल्या समर्थ रामदास सहकारी गृहनिर्माण सोसायटी या चार मजली इमारतीच्या टेरेस वरून ती खाली पडली. गंभीर दुखापत झालेल्या अवस्थेत तीला महाडच्या ग्रामीण रुग्णालयात नेलं मात्र तेथे डॉक्टरांनी तिला मृत घोषित केलं. ती इमारतीवरु पडली कशी याबद्दल कोणतीही माहिती अद्याप मिळालेली नाहीय.