मराठा आरक्षणावरुन मंत्री छगन भुजबळ विरुद्ध मनोज जरांगे संघर्ष टोकाला गेलाय.. त्यातच आता भुजबळांनी रोज रोज टीका करणारा कोण आहे रे तू? असं म्हणत जरांगेंना थेट निवडणुकीत उतरण्याचं आव्हान दिलंय. खरंतर सरकारने मराठा आरक्षणासाठी हैदराबाद गॅझेटियरचा जीआर काढल्यानंतर ओबीसी समाज चांगलाच आक्रमक झालाय.

त्यातच विजय वडेट्टीवारांच्या नेतृत्वात नागपूरमध्ये ओबीसींनी जीआर रद्द करण्याची मागणी करत एल्गार पुकारला. तर दुसरीकडे 17 ऑक्टोबरला बीडमध्येही ओबीसी भुजबळांच्या नेतृत्वात एल्गार पुकारणार आहेत. या ओबीसी मोर्चावरुन जरांगेंनी वडेट्टीवार आणि भुजबळांवर हल्लाबोल केलाय.मात्र भुजबळांच्या आव्हानावर भाष्य करणं टाळलंय

लोकसभा आणि विधानसभा निवडणूक लढवण्याबाबत घोषणा करणाऱ्या जरांगेंनी नंतर सामाजिक प्रश्नावरच लढण्याचा निर्णय घेतला.. आता भुजबळांनी थेट निवडणूक लढवण्याचं आव्हान देत जरांगेंच्या जखमेवर मीठ चोळलंय.. त्यामुळे आगामी स्थानिक स्वराज्य संस्थांच्या निवडणुकीच्या तोंडावर जरांगे विरुद्ध भुजबळ हा संघर्ष आणखी तीव्र होत जाणार, हे मात्र निश्चित.