चंद्रपूर - हनी ट्रॅपच्या माध्यमातून एका वकिलाला फसवण्याचा प्रकार चंद्रपूर जिल्ह्यात उघडकीस आला आहे. जिल्ह्यातील गोंडपिंपरी तालुक्यात करंजी गावातील एका वकिलाला मोबाईलवर एक मुलीचा फोन आला. फोनवर संभाषण करतानाच तिने जाळे फेकले आणि यात हे वकील अडकले. बोलाचालीचा हा सिलसिला पुढे व्हीडीओ कॉलिंगपर्यंत गेला आणि त्यात सगळ्या अश्लील हरकती सुरू झाल्या. त्यानंतर मुलीने रंग दाखवायला सुरुवात केली.

हे देखील पहा -

मुलीने पैशांची मागणी सुरू झाली. पैसे दिले नाही तर सोशल मीडियावर सार्वत्रिक बदनामी करू, अशी धमकी ही मुलगी वकिलाला देऊ लागली. धमकीमुळे हा वकील घाबरला आणि काही मित्रांना घडलेली घटना सांगितली. मित्रांनी वकिलाला धीर देत पोलिसात जाण्याचा सल्ला दिला. शेवटी बदनामीची भीती मनातून काढत वकिलाने पोलिसात तक्रार दिली. त्यावरून गुन्हा दाखल करण्यात आला असून, अशा प्रकारांना लोकांनी बळी पडू नये, असे आवाहन पोलिसांनी केले आहे.

Edited By - Shivani Tichkule