Chatrapati Sambhaji Nagar News: छत्रपती संभाजीनगर जिल्ह्यातील कायगाव टोका येथे सिध्देश्वर मंदिराजवळ गोदावरी नदीत चार तरुणांचा पाण्यात बुडून मृत्यू झाल्याची घटना शनिवारी दुपारी साडेतीनच्या सुमारास घडली.

याबाबत माहिती अशी की वैजापूर तालुक्यातील काही तरुण कावडीने पाणी नेण्यासाठी कायगाव येथे आले होते. दरम्यान आंघोळीसाठी गोदावरीत उतरल्याने त्यांचा नदीपात्रात बुडून मृत्यू झाला.

बाबासाहेब अशोक गोरे (वय 35), नागेश दिलीप गोरे (वय 20), आकाश भागिनाथ गोरे (वय 20) आणि शंकर पारसनाथ घोडके (वय 22) अशी पाण्यात बुडालेल्या चार तरुणांची नावे आहेत. हे चौघेही वैजापूर तालुक्यातील पालखेड येथील रहिवासी आहेत.

शनिवारी दुपारी साडेतीन ते चार वाजण्याच्या दरम्यान ही घटना घडली. दरम्यान शंकर पारसनाथ घोडके याचा मृतदेह बाहेर काढण्यात यश आले असून अन्य तिघांचे मृतदेह शोधण्यासाठी मोहीम राबवली जात आहे.