बालाजी सुरवसे, साम टीव्ही

धाराशिव : तुळजाभवानीच्या मंदिरात रांगेत भक्तांमध्ये फ्री स्टाइल हाणामारी झाल्याची घटना घडली आहे. किरकोळ वाद टोकाला जाऊन भक्तांमध्ये हाणामारी झाली. भक्तांच्या हाणामारीचा व्हिडिओ सोशल मीडियावर व्हायरल झाला आहे. फ्री स्टाइल हाणामारीनंतर भक्तांनी प्रशासनाच्या नियोजनावर बोट ठेवलं आहे.

धाराशिवात प्रसिद्ध तुळजाभवानी मंदिर आहे. याच तुळजाभवानी देवीला महाराष्ट्राची कुलस्वामिनी मानले जाते. मात्र, देवीच्या चरणी माथा टेकायला आलेल्या भक्तांमध्येच हाणामारी झाल्याची घटना घडली आहे. तुळजाभवानीच्या मंदिरात किरकोळ कारणातून भक्तांमध्ये वाद झाला. या वादानंतर भक्तांमध्ये फ्री स्टाइल हाणामारी झाली.

नेमकं काय घडलं?

तुळजाभवानीच्या मंदिरातील दर्शन रांगेत भक्तांमध्ये हाणामारी झाली. लहान मुलाने उलटी केल्याच्या कारणावरून महिला आणि पुरुषात हाणामारी झाली. मंदिराच्या दर्शन रांगेतील वाद १५ ते २० मिनिट सुरू होता. २० मिनिटानंतर दर्शन रांगेचे नियोजन करणारे सिक्युरिटी गार्ड घटनास्थळी पोहोचले. तुळजाभवानी मंदिरात रविवार सुट्टी असल्याने भाविकांची दर्शनासाठी गर्दी पाहायला मिळाली.

दुसरीकडे मंदिराच्या दर्शन रांगेतील फॅन बंद पडले आहेत. गर्दी आणि उकाडा सुरू असल्याने भाविकांमध्ये वाद वाढले आहेत. त्यात प्रशासनाकडून दर्शन रांगेच्या नियोजनात चूक होत असल्याचा भाविकांचा आरोप आहे.

तुळजाभवानी मंदिर परिसरात तंबाखूजन्य पदार्थ सेवन करून थुंकण्यास मनाई

महाराष्ट्राची कुलस्वामिनी आई तुळजाभवानी मातेच्या मंदिर आणि परिसरात तंबाखूजन्य पदार्थ सेवन करून थुंकण्याच्या प्रकारात वाढ झाली आहे. यामळे त्यामुळे मंदिर संस्थानच्या वतीने मंदिर आणि परिसरात तंबाखूजन्य पदार्थ खाणाऱ्यांवर मंदीर बंदीची कारवाई करण्याचा इशारा देण्यात आला आहे. याबाबत काही भाविकांनी संस्थानकडे तक्रार केल्या होत्या.

भाविकांनी, पुजाऱ्यांनी आणि कर्मचाऱ्यांनी तंबाखूजन्य पदार्थ सेवन करून थुंकल्याचे निर्देशनात आल्यास कर्मचाऱ्यांवर शिस्तभंगाची कारवाई केली जाईल. तर पुजारी आढळल्यास मंदिर बंदीची कारवाई करण्यात येणार आहे. तर भाविकांना देखील मंदीरात जाण्यापासून रोखले जाणार आहेत, अशी माहिती मंदिर संस्थानच्या वतीने देण्यात आली आहे.