चंद्रपूर : चंद्रपूर जिल्ह्याच्या राजकारणात भाजपमधील अंतर्गत कलह पहिल्यांदाच जाहीरपणे उफाळून आला आहे. ज्येष्ठ नेते सुधीर मुनगंटीवार यांचे खंदे समर्थक देवराव भोंगळे यांना राजुरा विधानसभेची उमेदवारी दिल्यामुळे दोन माजी आमदारांसह शेकडो कार्यकर्त्यांनी उघडउघड बंडखोरीची भूमिका घेतली आहे. आता पुढील काळात हि भूमिका काय चित्र निर्माण करेल हे पाहणे महत्वाचे ठरणार आहे.

चंद्रपूरमधील (Chandrapur) भाजपचे माजी आमदार संजय धोटे आणि माजी आमदार सुदर्शन निमकर यांनी आज राजुरा येथे माध्यमांपुढे येत आपली भूमिका मांडली. (BJP) राजुरा क्षेत्राची उमेदवारी जाहीर झालेले देवराव भोंगळे हे स्थानिक नाहीत. त्यांचे कोणतेही कार्य या क्षेत्रात नाही. शिवाय लोकसभा निवडणुकीत निरीक्षक म्हणून त्यांनी केलेल्या चुकीच्या कामांमुळे पक्षाला या क्षेत्रात मोठा फटका सहन करावा लागला; असा गंभीर आरोप या माजी आमदारांनी केला. 

तर पक्षाच्या विरोधात जाऊन उमेदवार देऊ 

याशिवाय केवळ एका मोठ्या नेत्याचे समर्थक असल्याने स्थानिकांना डावलून बाहेरचे पार्सल स्थानिकांच्या माथी मारले गेल्याची भावना कार्यकर्त्यांमध्ये निर्माण झाली आहे. हे पार्सल माघारी न बोलावल्यास नाइलाजाने पक्षाच्या विरोधात जावून उमेदवार देवू आणि हे पार्सल पराभूत करू; अशी जहाल भूमिका माजी आमदारांनी मांडली. हीच भूमिका आम्ही वरिष्ठ नेत्यांना भेटून पटवून देण्याचा प्रयत्न करणार असल्याचेही ते म्हणाले.