चंद्रपूरमधून एक धक्कादायक बातमी उघडकीस आली आहे. दिवाळी गिफ्ट मागण्यावरून झालेल्या वादातून सहा जणांनी मिळून एका तरूणाची निर्दयतेने हत्या केली. या प्रकरणी पोलिसांनी तपासाला सुरूवात केली. अवघ्या तासाभरात पोलिसांनी तपासाची चक्रे फिरवून आरोपीला ताब्यात घेतलं. या प्रकरणानंतर परिसरात खळबळ उडाली आहे.

नीतेश ठाकरे (वय वर्ष २७) असे मृत तरूणाचे नाव आहे. तो दुर्गापूर परिसरात सुजित गणवीर याच्या पानटपरीवर काम करीत होता. दिवाळीच्या निमित्ताने भेटवस्तू (गिफ्ट) देण्यात यावे, अशी मागणी त्यांनी केली. तो मालकाकडे वारंवार गिफ्टची मागणी करीत होता. या मागणीसह तरूण शिवीगाळ करत असल्याची माहिती समोर आली आहे.

नीतेश वारंवार सुजित त्रास देत होता. याच त्रासाला कंटाळून सुजितने नीतेशची हत्या करण्याचा निर्णय घेतला. सुजित गणवीरने आपल्या साथीदारांच्या मदतीने नीतेशची विधी महाविद्यालय (लॉ कॉलेज) परिसरात हत्या केली. हत्या केल्यानंतर मृतदेहाची विल्हेवाट लावण्याचा देखील प्रयत्न करण्यात आला.

मात्र, घटनेची माहिती मिळताच स्थानिक गुन्हे शाखेने तात्काळ तपासाची चक्रे फिरवली. तसेच केवळ एका तासात सर्व आरोपींना ताब्यात घेतलं. करण मेश्राम (२२), यश छोटेलाल राऊत (१९), अनिल रामेश्वर बोंडे (२२), प्रतीक माणिक मेश्राम (२२), तौसीफ शेख (२३) आणि सुजित गणवीर (२५) अशी आरोपींची नावे आहेत. या प्रकरणानंतर परिसरात खळबळ उडाली असून, पुढील तपास पोलिसांकडून सुरू आहे.