चंद्रपुर : महिला, मुलींवरील अत्याचाराच्या घटना अजूनही थांबलेल्या नाहीत. एकट्या महिला, मुलीला पाहून तिची छेळ काढणे किंवा तिच्यावर अत्याचाराच्या घटना सातत्याने होत आहे. अशीच एक घटना चंद्रपूर जिल्ह्यात घडली असून रस्त्याने पायी जात असलेल्या तरुणीला लिफ्ट देण्याच्या बहाण्याने शेतात नेत तिच्यावर सामूहिक अत्याचार करण्यात आला. या घटनेने चंद्रपूर जिल्ह्यात खळबळ उडाली आहे. 

चंद्रपूर जिल्ह्यातील चिमूर तालुक्यात माणुसकीला काळिमा फासणारी हि घटना समोर आली आहे. या घटनेत एका १९ वर्षीय तरुणीवर तिघांनी मिळून शेतात नेऊन सामूहिकरीत्या लैंगिक अत्याचार केला. दरम्यान पीडित तरुणी आपल्या आजीच्या घरी पायी चालत जात होती. यावेळी युवतीसोबत ओळख असलेल्या प्रतीक साटोने (वय २६) याने तिला दुचाकीवर बसवून घरी सोडण्याचे सांगत लिफ्ट दिली. मात्र त्याने तिला घरी न नेता शेतात घेऊन गेला. 

दोन साथीदारांना बोलावून घेत केला अत्याचार 

सदर युवतीला शेतात घेऊन गेला आणि तिच्यावर लैंगिक अत्याचार केला. त्यानंतर त्याने आपल्या दोन साथीदारांना बोलावून घेतले. यात विकी साटोने (वय २९) आणि अंकित काकडे (वय ३१) यांना बोलावून तिघांनी मिळून सामूहिक अत्याचार केला. सदरची घटना एप्रिल महिन्यात घडली असून बदनामीच्या भीतीने पीडितेने आतापर्यंत कोणालाही काही सांगितले नव्हते. अखेर महिनाभरानंतर हि घटना समोर आली आहे.  

दोघेजण ताब्यात, एक फरार 

मात्र पीडित युवतीने अखेर धाडस करून पोलीस ठाण्यात जात घडल्या प्रकारची पोलिसांनी माहिती देत तक्रार दाखल केली. यानंतर चिमूर पोलिसांनी तत्काळ कारवाई करत प्रतीक आणि विकीला अटक केली असून अंकित सध्या फरार आहे. पोलिस त्याचा शोध घेत असून घटनेचा तपास पोलीस करत आहेत.