कोकणवासियांसाठी मोठी बातमी समोर आली आहे. कोकण मार्गावर प्रवाशांचा मोठा ओघ असलेल्या दिवा–सावंतवाडी रोड–दिवा एक्सप्रेसच्या वेळापत्रकात महत्त्वाचे बदल लागू करण्यात येणार आहेत. येत्या १२ तारखेपासून हा बदल लागू करण्यात येणार आहेत. या सुधारित वेळापत्रकामुळे प्रवाशांच्या वेळेची बचत होणार आहे.

दिवा–सावंतवाडी रेल्वेच्या वेळापत्रकात येत्या १२ जानेवारी पासून महत्त्वाचे बदल लागू करण्यात येणार आहेत. नव्यावर्षात आता सुधारित वेळापत्रकानुसार दिवा–सावंतवाडी एक्सप्रेस ही १० ते १५ मिनिटे आधी म्हणजेच सकाळी ६ ते ६.१५ दरम्यान दिवा स्थानकातून सुटणार आहे. याशिवाय या एक्सप्रेसच्या मार्गावरील इतर स्थानकांच्या वेळांमध्येही बदल करण्यात आले आहेत.

पनवेल, रोहा, चिपळून, रत्नागिरी, कणकवली आणि कुडाळ या स्थानकांवर ही गाडी आता वेळेच्या १० ते १५ मिनिटे आधी पोहोचणार आहे. तर सावंतवाडीवरून दिव्याच्या परतीच्या प्रवासाच्या वेळेतही बदल करण्यात आला आहे. ही गाडीही आता पूर्वीपेक्षा १० ते १५ मिनिटे आधी धावणार असून, यामुळे परतीच्या प्रवासातही वेळेची बचत होणार आहे.

या बदलांची नोंद घ्यावी असे आवाहन रेल्वे प्रशासनाच्यावतीने करण्यात आले आहे. सुधारित वेळापत्रक १२ जानेवारीपासून लागू होणार आहे. त्यामुळे नागरिकांनी वेळापत्रक पाहूनच घराबाहेर पडा असे आवाहन रेल्वे प्रशासनाकडून करण्यात आले आहे.