संजय जाधव, साम टीव्ही

बुलढाण्यातून मोठी बातमी हाती आली आहे. बुलढाण्यात मध्य रेल्वेची नागपूरकडे जाणारी रेल्वे वाहतूक विस्कळीत झाली आहे. बुलढाण्यातील मलकापूर रेल्वे स्टेशनवर रुळावरून मालगाडीचे डबे घसरल्याची घटा घडली. या घटनेची माहिती मिळताच रेल्वेचे अधिकारी घटनास्थळी पोहोचले. वाहतूक सुरळीत करण्याचे काम युद्ध पातळीवर सुरू आहे. या घटनेनंतर नागपूरकडे जाणारी वाहतूक सायंकाळी 5 वाजतापासून डाऊन ठप्प झाली आहे.

मिळालेल्या माहितीनुसार, मध्य रेल्वेवर पुन्हा एकदा रेल्वेचे डबे रुळावरून घसरल्याची घटना घडली आहे. बुलढाणा जिल्ह्यातील मलकापूर रेल्वे स्टेशनवर आज मंगळवारी ५ वाजता मालगाडीचे दोन डबे रुळावरून घसरल्याने डाऊन रेल्वे सेवा विस्कळीत झाली आहे.

या दुर्घटनेनंतर तातडीने रेल्वे विभागाचे अधिकारी घटनास्थळी पोहोचले. त्यांना रेल्वेचे डबे रुळावर ठेवण्यात यश आल्याची माहिती मिळत आहे. रुळ बदलणाऱ्या यंत्रणेत बिघाड झाल्याने ही घटना घडल्याचे सांगण्यात येत आहे. काही तासांत मध्य रेल्वेची डाऊनची सेवा पूर्ववत होईल, अशी माहिती रेल्वे विभागाने दिली आहे.