स्थानिक स्वराज्य संस्थांच्या निवडणुका लवकरच जाहीर होतील. यासाठी प्रत्येक पक्षानं कंबर कसली आहे. पक्षाचं बळ वाढवण्यासाठी काही भागात फोडाफोडीचं राजकारण सुरूये. तसेच महायुती आणि महाआघाडीमध्ये जागावाटपावरून बड्या नेत्यांमध्ये चर्चा सुरू आहे. याच पार्श्वभूमीवर बुलढाणा जिल्ह्यातील राजकीय वातावरण चांगलंच तापलं आहे. जागावाटपावरून महायुतीत शिंदेसेना आणि भाजप पक्षात अंतर्गत संघर्ष निर्माण झाला आहे.

महायुतीत पहिला बॉम्ब फोडत आमदार संजय गायकवाड यांनी स्पष्ट शब्दांत इशारा दिला आहे. 'युती करायची असेल तर, संपूर्ण जिल्ह्यात सन्मानजनक पद्धतीने करा. काही ठिकाणी युती, काही ठिकाणी नाही. असं चालणार नाही', असं आमदार संजय गायकवाड म्हणाले. यावेळी गायकवाड यांनी थेट मागणी केली आहे. 'चिखलीचे नगराध्यक्ष पद शिंदेसेनेला द्या. त्याबदल्यात मी तुम्हाला बुलढाण्याची जागा सोडतो' असंही गायकवाड म्हणाले. त्यांनी केलेल्या या विधानामुळे जिल्ह्यातील महायुतीत मोठा राजकीय धुरळा उडाला आहे.

या वक्तव्यावर भाजपकडूनही तीव्र प्रतिक्रिया आली आहे. भाजप जिल्हाध्यक्ष विजयराज शिंदे यांनी सांगितले की, 'सिटिंग जागा ज्याची असेल त्याला ती जागा मिळते, असा नियम आहे . चिखलीची जागा मागण्याचा त्यांना अधिकार नाही. कारण तिथे भाजपचा नगराध्यक्ष मागील निवडणुकीत निवडून आलेला आहे. त्यामुळे ती जागा भाजपची राहणार', असं विजयराज म्हणाले.

'बुलढाण्यातील जागेचा प्रश्न असेल तर, मागच्या २५ वर्षांपूर्वी ना भाजपचा नगराध्यक्ष होता, ना शिंदे गटाचा. त्यामुळे ही जागा मागायचा प्रश्नच नाही. शिवाय जर बुलढाण्यातील नगराध्यक्षाची जागा भाजपला सुटणार असेल. भाजपाला देण्यात आली, तर आम्ही युतीत लढण्यास तयार आहोत', असंही विजयराज शिंदे यांनी म्हटलं आहे.