Buldhana Police News : बुलढाणा पोलिसांनी आवळल्या " छर्रा गँग " या सराईत आंतरराज्य गुन्हेगारी टोळीच्या मुसक्या. गुजरात राज्यात जाऊन अहमदाबाद येथील छर्रा नगर येथे जाऊन पाेलिसांनी (buldhana police) मोठी कारवाई केली आहे. या गॅंगमधील सहा जणांना अटक (arrest) करण्यात बुलढाणा पोलिसांना यश आले आहे. (Maharashtra News)

गेल्या अनेक दिवसांपासून जिल्ह्यात बँकेतून मोठी रक्कम काढणाऱ्या व्यक्तींकडून लुटमार करून रक्कम लुटणे, कार किंवा दुचाकीच्या डिक्कितील रक्कम लंपास करणे असे गुन्हे वाढले होते. त्यानुसार शेगाव परिसरात गस्त घालत असताना पोलिसांना बाळापूर मार्गावर रात्री काही लाेक संशयास्पद आढळले.

त्यातील दोघांची चौकशी केली असता एका अंतरराज्यीय टोळीचा पर्दाफाश झाला. या टोळीतील अनेकजण हे गुजरात मधील अहमदाबाद येथील छर्रा नगर येथील असल्याची माहिती पोलिसांना मिळाली. त्यानुसार पोलिसांनी गुजरात येथे जाऊन या परिसरात गुप्त कारवाई करत सहा जणांना ताब्यात घेतले.

या सर्वांना पाेलिसांनी बुलढाण्यात आणले. त्यांच्यावर अटकेची कारवाई केली. या आंतरराज्यीय टोळीने अनेक ठिकाणी बँकेतील रक्कम काढणाऱ्या ग्राहकांना लुटून तसचं कार किंवा दुचाकीच्या डिकीत ठेवलेली रक्कम चोरल्याचे गुन्हे केले आहेत. त्यादृष्टीने पाेलिसांचा कसून तपास सुरु आहे.

Edited By : Siddharth Latkar