संजय जाधव, साम प्रतिनिधी

बुलढाणा नगरपालिकेच्या निवडणुकीमध्ये बोगस मतदान झाल्याने मोठा तणाव निर्माण झाला होता. याप्रकरणी केंद्रावर दुसऱ्याच्या नावावर बोगस मतदान करणाऱ्या तिघांना विरुद्ध आणि सरकारी कामात अडथळा आणल्या प्रकरणी दोघाजणांविरुद्ध गुन्हा करण्यात आलाय. बुलढाणा जिल्ह्यात 10 नगरपालिकेच्या अध्यक्ष आणि 122 प्रभागाचे नगरसेवक निवडण्यासाठी सकाळी मतदान प्रक्रियेला सुरुवात झाली.

बुलढाणा शहरातील गांधी प्राथमिक शाळेमध्ये असलेल्या मतदान केंद्रावर दुसऱ्याच्या नावावर तिघांनी बोगस मतदान केलं. निवडणूक अधिकारी आणि विरोधी पक्षातील उमेदावारांनी या तिघांना पकडलं. पोलिसांनी तिघा जणांविरुद्ध गुन्ह्याची नोंद केलीय. तसेच शासकीय तंत्रनिकेतन केंद्र येथील मतदान केंद्रावर दुसऱ्याच्या नावावर मतदान करण्यासाठी आलेल्या व्यक्तीला नागरिकांनी पकडले, त्याला पोलीस ताब्यात घेत असतानाच त्यास पळून जाण्यास मदत केली.

शासकीय कामात अडथळा आणला याप्रकरणी आमदार संजय गायकवाड यांचा मुलगा आणि या प्रभागाचे उमेदवार कुणाल गायकवाड आणि पुतण्या श्रीकांत गायकवाड यांच्याविरुद्ध बुलढाणा शहर पोलीस स्टेशनमध्ये सरकारी कामात अडथळा आणल्याप्रकरणी गुन्हा नोंद करण्यात आलाय. याची माहिती आल्याची माहिती बुलढाण्याचे पोलीस अधीक्षक निलेश तांबे यांनी दिली आहे.

बुलढाण्याचे शिवसेना शिंदे गटाचे आमदार संजय गायकवाड यांचे पुत्र कुणाल गायकवाड व नातेवाईक असलेला श्रीकांत गायकवाड यांच्यावर बुलढाणा पोलिसात गुन्हा दाखल झालाय. बोगस मतदाराला पोलिसांच्या ताब्यातून पळवून लावण्यास कुणाल गायकवाड मदत करत असल्याचा व्हिडिओ सोशल मीडियावर व्हायरल झाला होता. यामुळे या प्रकरणाची राज्यभर चर्चा झाली. अखेर कुणाल गायकवाड आणि श्रीकांत गायकवाड या दोघांवर गुन्हा दाखल करण्यात आलाय.