चिखली तालुक्यातील सावरगाव डुकरे गावात एक धक्कादायक घटना घडलीय. एका मुलाने कुऱ्हाडीने वार करत आई-वडिलांची हत्या केली. त्यानंतर स्वता:ने आत्महत्या केली. या घटनेने संपूर्ण परिसरात हळहळ व्यक्त केली जातेय. ही भीषण घटना उघडकीस येताच गावात एकच खळबळ उडाली. स्थानिकांनी तत्काळ पोलिसांना याबाबत माहिती दिली त्यानंतर पोलीस दल घटनास्थळी दाखल झाले.

त्यानंतर पोलिसांनी घटनास्थळी पंचनामा करून मृतदेहांना पोस्टमार्टमसाठी जिल्हा उपरुग्णालय चिखली येथे पाठवले. मात्र मुलानं असं कृत्य केलं याचे कारण अद्याप समोर आले नाहीये. पोलीस याप्रकरणाचा सखोल तपास कर आहेत. शेजाऱ्यांकडून आणि नातेवाईकांकडून अधिक माहिती घेतली जात आहे.

मिळालेल्या माहितीनुसार, सावरगाव डुकरे येथील ४२ वर्षीय विशाल सुभाष डुकरे या व्यक्तीने सकाळच्या सुमारास आपल्या आई-वडिलांवर कुऱ्हाडीने वार केले. यात वडील सुभाष डुकरे (वय ७५) आणि आई लता डुकरे (वय ६५ ) या दोघांचा जागीच मृत्यू झाला. आई-वडिलांची हत्या केल्यानंतर विशाल डुकरेने स्वतःला गळफास लावत जीव दिला.

या घटनेनंतर सावरगाव डुकरे गावात शोककळा पसरली आहे. दरम्यान फॉरेन्सिक तपासणी आणि मृतदेहांच्या पोस्टमॉर्टेम अहवालानंतरच हत्येमागचं खरं कारण समोर येईल अशी माहिती पोलिसांनी दिलीय.

दरम्यान दोन दिवसांपूर्वी रायगडमधेही अशीच घटना घडली होती. म्हसळा तालुक्यातील मेंदडी गावातील दोन मुलांनीच आपल्या वृद्ध आई-वडिलांची घटना घडलीय.आईवडील आपल्याला घरखर्च देत नाहीत. घरात राहू देत नाहीत याच्या रागातून दोन्ही मुलांनी आई-वडिलाचा खून केला. मृतांची नावे महादेव कांबळे (वय ७०) आणि विठाबाई कांबळे (वय ६५) अशी होती. दोघांचे मृतदेह दोन दिवसांपूर्वी त्यांच्या राहत्या घरात कुजलेल्या अवस्थेत आढळले होते.