बुलडाणा : माध्यमिक व उच्च माध्यमिक विद्यालय, बुलढाणा (Buldhana) येथील इयत्ता ११ च्या विज्ञान शाखेत प्रवेश देण्याकरिता विद्यार्थ्यांच्या पालकांकडून दहा हजारांची लाच (Bribe) स्वीकारताना मुख्याध्यापकासह चार जणांना लाचलुचपत प्रतिबंधक विभागाच्या पथकाने रंगेहात पकडलं असून या चौघांना अटक करण्यात आली आहे.

काल सायंकाळी साडे सहाच्या सुमारास माध्यमिक व उच्च माध्यमिक विद्यालय येथे सदर कारवाई करण्यात आली आहे मुख्याध्यापक प्रल्हाद धोंडू गायकवाड, वस्तीगृह कार्यवाहक गजानन सुखदेव मोरे, मजूर जितेंद्र प्रल्हाद हिवाळे आणि लेखापाल राहुल विष्णू जाधव अशी अटक करण्यात आलेल्या आरोपींची नावे आहेत.

विद्यालयामध्ये तक्रारदाराच्या मुलाला अकरावीत प्रवेश देण्यासाठी मुख्याध्यापक प्रल्हाद गायकवाड यांच्या वतीने वस्तीगृह कार्यवाहक गजानन मोरे याने पंधरा हजाराच्या लाचेची मागणी केली. तडजोडी अंती दहा हजारात सौदा पक्का केला गेला.

आरोपी जितेंद्र प्रल्हाद हिवाळे याने तक्रारदारास लाच देण्यासाठी प्रवृत्त केले तर आरोपी लेखापाल राहुल विष्णू जाधव याने मुख्याध्यापकाच्या सांगण्यावरून तक्रारदाराकडून दहा हजाराची लाच स्वीकारली. याप्रकरणी लाचलुचपत प्रतिबंधक विभागाच्या पथकाने चारही आरोपींना रंगेहात अटक केली.

Edited By - Jagdish Patil