संजय जाधव, बुलढाणा

बुलढाण्यात ३० प्रवाशांना घेऊन जाणाऱ्या महामंडळाच्या बसचा भीषण अपघात झाला. बसचे ब्रेक फेल झाल्याने बस अनियंत्रित होऊन अपघात झाला. सदर अपघात हा धाड–बुलढाणा मार्गावरील वरुड परिसरात, शरद पवार विद्यालय व कनिष्ठ महाविद्यालयाजवळ घडला आहे. सुदैवाने कोणतीही जीवित हानी झाली नसून चालकाच्या सतर्कतेमुळे मोठा अनर्थ टळला आहे.

मिळालेल्या माहितीनुसार, वरुड–सोयगाव–जामठी मार्गावर धावणारी एसटी बस क्रमांक MH 20 BL 1806 अचानक अनियंत्रित झाली.यावेळेस या बसधून सुमारे ३० प्रवासी प्रवास करत होते. मोठा आवाज झाल्यानंतर ब्रेक पाइप फुटल्याने बसचे ब्रेक निकामी झाल्याचे चालक एन. आर. शिपने यांच्या लक्षात आले.परिस्थिती गंभीर असतानाही चालकाने प्रसंगावधान राखत गिअर बदलून बसचा वेग कमी करण्याचा प्रयत्न केला.

रस्त्याच्या दोन्ही बाजूंना घरे, नागरिक आणि वाहने असल्यामुळे बस वळवणे शक्य नव्हते. अखेर संभाव्य जीवितहानी टाळण्यासाठी चालकाने समोर असलेल्या गजानन माघाडे यांच्या घराजवळील विद्युत पोलच्या ताणाला बस धडकवली. त्यानंतर बस रस्त्याच्या उजव्या बाजूला डोंगरे यांच्या शेतातील कडब्याच्या गंजीवर जाऊन थांबली. या अपघातात बसखाली आलेल्या दुचाकीस्वाराचाही जीव थोडक्यात वाचला. स्थानिक नागरिकांनी तात्काळ धाव घेऊन त्याला सुरक्षित बाहेर काढले. दुचाकीस्वार सुखरूप असल्याचे समजताच सर्वांनी सुटकेचा नि:श्वास सोडला.

घटनेची माहिती मिळताच ठाणेदार प्रताप भोस यांच्या मार्गदर्शनाखाली पोलीस पथक घटनास्थळी दाखल झाले. केंद्रे साहेब आणि पोलीस कॉन्स्टेबल माळी यांनी पंचनामा करून पुढील कारवाई केली. यावेळी परिसरातील पोलीस पाटील, सरपंच, उपसरपंच तसेच मोठ्या संख्येने नागरिक उपस्थित होते. चालकाच्या सतर्कतेमुळे आणि नागरिकांच्या मदतीमुळे मोठा अनर्थ टळला असला, तरी वारंवार होणाऱ्या अशा घटनांमुळे एसटीच्या जुन्या व भंगार बसेसचा प्रश्न पुन्हा गंभीर बनला आहे.