सचिन बनसोडे, साम टीव्ही | शिर्डी, ३ डिसेंबर २०२४

Shirdi Latest Marathi News

काँग्रेसचे शिर्डी शहराध्यक्ष सचिन चौगुले यांच्यावर १० ते १२ जणांनी प्राणघातक हल्ला केल्याची धक्कादायक घटना समोर आली आहे. राहाता तालुक्यातील लोणी गावात हा हल्ला झाल्याचं कळतंय. या हल्ल्यात चौगुले यांच्यासह शिर्डीचे माजी नगरसेवक सुरेश आरने गंभीर जखमी झाले आहेत. त्यांना उपचारासाठी रुग्णालयात दाखल करण्यात आलं आहे. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

चौगुले यांच्यावरील हल्ल्याने संपूर्ण अहमदनगर जिल्ह्यात (Ahmednagar News) खळबळ उडाली आहे. काँग्रेस कार्यकर्ते आणि शिर्डी ग्रामस्थांची रुग्णालयाबाहेर मोठी गर्दी केली होती. याप्रकरणी पोलिसांनी अज्ञात हल्लेखोरांविरोधात गुन्हा दाखल केला असून त्यांचा शोध सुरू केला आहे.

मिळालेल्या माहितीनुसार, संगमनेर तालुक्यातील आश्वी गावात मंगळवारी राष्ट्रवादी काँग्रेसचे सर्वेसर्वा शरद पवार यांचा कार्यक्रम होता. या कार्यक्रमाला चौगुले यांनी हजेरी लावली. दरम्यान, कार्यक्रमाहून परतत असताना सायंकाळी लोणी गावाजवळ अज्ञात आरोपींनी त्यांच्या कारवर हल्ला केला.

या हल्ल्यात सचिन चौगुले व त्यांच्याबरोबर असलेले सुरेश आरणे हे दोघे जखमी झाले आहेत. हल्ल्यानंतर दोघांनाही संगमनेर तालुक्यातील खाजगी रुग्णालयात दाखल करण्यात आलं. दरम्यान, या घटनेनंतर काँग्रेस नेते बाळासाहेब थोरात यांनी रुग्णालयात जाऊन चौगुले यांची भेट घेतली.

यावेळी रुग्णालयाबाहेर मोठी गर्दी जमली होती. आजची घटना ही दहशतवादी कृत्य असून विरोधकांचा आवाज बंद करण्याचा हा प्रयत्न असल्याचा आरोप बाळासाहेब थोरात यांनी केला आहे. पोलिसांनी निपक्षपातीपणे कारवाई केली नाही तर तीव्र आंदोलन करण्याचा इशारा सुद्धा बाळासाहेब थोरात यांनी दिला.