राजेश भोस्तेकर

रायगड : महाडला भेडसावणारी पुराची समस्या आणि त्यावरील उपाय योजना यावर चर्चा करण्यासाठी आज महाड इथे खासदार सुनील तटकरे यांच्या प्रमुख उपस्थितीत बैठक आयोजित करण्यात आली होती. या बैठकीत महाडच्या पुराचा सर्वंकष अभ्यास करण्यासाठी प्रांताधिकारी यांच्या अध्यक्षतेखाली समिती गठीत करण्यात आली आहे. ही समिती अभ्यास करून 8 दिवसात आपला अहवाल सादर करेल.

हे देखील पहा :

आजच्या बैठकीत कोकण रेल्वेच्या पुलासाठी झालेल्या भरावामुळे महाडला पुराची समस्या भेडसावत असल्याचे मत अभ्यासकांनी व्यक्त केले. त्यावर सर्वेक्षण करून उपाय योजना करा तसेच सावित्री नदीतील बेटे तातडीने काढून टाकण्यासाठी प्रक्रिया तातडीने सुरू करा अशा सूचना खासदार सुनील तटकरे यांनी संबंधित अधिकाऱयांना दिल्या.

यावेळी उपस्थित व्यापारी आणि नागरिकांनी पुरानंतर भेडसावणाऱ्या समस्यांसाठी शासकीय मदत, इन्शुरन्स क्लेम आदींबाबत समस्या मांडल्या. व्यापाऱ्यांना शासकीय मदतीचे आजपासून वितरण सुरू होईल असे सांगतानाच घरे, दुकाने, वाहने यांचे विमा क्लेम तातडीने पूर्ण करावेत अशा सूचना विमा कंपन्यांच्या अधिकाऱयांना दिल्या. आजच्या बैठकीला आमदार भरत गोगावले, महाडच्या नगराध्यक्षा स्नेहल जगताप, जिल्हाधिकारी महेंद्र कल्याणकर  यांच्यासह विविध विभागाचे अधिकारी, पूर नियंत्रण समितीचे सदस्य, व्यापारी, नागरिक उपस्थित होते.

Edited By : Krushnarav Sathe