एकीकडे नाशिकमधील मोकाट जनावरांचा प्रश्न दिवसेंदिवस गंभीर होत चालला आहे. तर दुसरीकडे शहरात एका आईच्या धाडसाचा प्रत्यय कॅमेऱ्यात टिपला गेला आहे. कळवण शहरातील गांधी चौक परिसरातून जात असताना एका मुलाला मोकाट जनावरांनी पायदळी तुडवले. दरम्यान आईच्या धाडसी कृतीने मुलाचे प्राण वाचले आहेत. सदर घटनेचा व्हिडीओ सीसीटीव्हीत कैद झाला असून तो सध्या सोशल मीडियावर व्हायरल होत आहे.

मिळालेल्या माहितीनुसार, एक व्यक्ती आपल्या पत्नी आणि दोन लहान मुलांसह मोटारसायकलवरून गांधी चौकातून जात होता. अचानक रस्त्यावर उभ्या असलेल्या मोकाट जनावराने वेगाने धावत जाऊन थेट मोटारसायकलला जोरदार धडक दिली. धडकेनंतर मोटारसायकलवरील सर्वजण रस्त्यावर पडले. पत्नीने ताबडतोब आपल्या एका मुलीला उचलून सुरक्षित ठिकाणी धाव घेतली. मात्र दुसरे लहान मूल रस्त्यावरच अडकले आणि त्या जनावराने त्या निरागस मुलाला पायदळी तुडवण्यास सुरुवात केली.

आईने आपल्या मुलाच्या जीवासाठी आर्त हाक दिली आणि धैर्य एकवटत थेट मोकाट जनावरासमोर उभी ठाकली. तिने जनावराला हाताने, शरीराने अडवून आपल्या मुलाला वाचवले. त्या क्षणी आजूबाजूचे नागरिक धावत आले आणि एकत्र येऊन जनावराला तेथून पळवून लावले.

या घटनेनंतर परिसरात प्रचंड खळबळ उडाली आहे. काही क्षणांसाठी त्या कुटुंबाच्या जीवाला मोठा धोका निर्माण झाला होता. सुदैवाने आईच्या धाडसामुळे आणि नागरिकांच्या तातडीच्या मदतीमुळे एका मोठ्या दुर्घटनेपासून बचाव झाला. तथापि, या प्रकारामुळे शहरातील नागरिकांमध्ये संतापाची लाट उसळली आहे.

या घटनेनंतर स्थानिक नागरिकांनी संताप व्यक्त केला असून मोकाट जनावरांपासून संरक्षण मिळावे यासाठी तातडीने उपाययोजना करण्याची मागणी केली आहे. दरम्यान, या घटनेचा व्हिडीओ सोशल मीडियावर व्हायरल झाल्याने संपूर्ण नाशिक जिल्ह्यातून विविध प्रतिक्रिया उमटत आहेत.

एका निष्पाप मुलाच्या जीवावर आलेला प्रसंग आणि त्याच्या आईचे धैर्य अनेकांसाठी प्रेरणादायी ठरत आहे. मात्र दुसरीकडे, शहरातील मोकाट जनावरांचा प्रश्न हा गंभीर असून त्याकडे प्रशासनाने गांभीर्याने लक्ष दिले नाही, तर यापेक्षा मोठ्या दुर्घटना घडण्याची शक्यता नाकारता येत नाही.