आर्थिक वादातून एका प्रियकराने आपल्या प्रेयसीची हातोड्याने वार करत हत्या केल्याची संतापजनक घटना समोर आली आहे. ही घटना कोल्हापूरच्या रूकडी फाट्याजवळील सागरीका लॉजमध्ये घडली असून, या घटनेमुळे परिसरात खळबळ उडाली आहे. या घटनेनंतर पोलीस ठाण्यात गुन्हा दाखल करण्यात आला असून, पुढील तपास सुरू आहे.

सुमन सुरेश सरगर असे मृत महिलेचं नाव आहे. तर, आदमगौस पठाण असं संशयित आरोपीचे नाव आहे. मिळालेल्या माहितीनुसार, प्रियकर आणि प्रेयसी दोघेही कोल्हापुरातील रूकडी फाटा येथील सागरीका लॉजवर गेले होते. यादरम्यान, त्यांच्या आर्थिक कारणावरून वाद झाला होता. वाद शिगेला पोहोचला. प्रियकराला राग अनावर झाला. त्याने थेट हातोडा घेतला आणि महिलेच्या अंगावर वार केले.

आरोपीने केलेल्या वारामुळे महिला रक्तबंबाळ झाली. या हल्ल्यातच तिचा मृत्यू झाला. या प्रकरणाची माहिती पोलिसांना मिळाल्यानंतर त्यांनी घटनास्थळी धाव घेत तपास केला. दरम्यान, आरोपीची गुन्हेगारी पार्श्वभूमी असल्याची माहिती समोर आली आहे. पठाणने यापूर्वी आपल्या पत्नीची निर्घृण हत्या केली असल्याची माहिती समोर आली आहे. दरम्यान, आता त्याने प्रेयसीची देखील हातोड्याचे वार करून हत्या केली आहे.

नाल्यात वाहून गेलेल्या जेष्ठ महिलेचा मृत्यू; मृतदेह वारजे येथे सापडला

पुण्यातील नवले पुलाजवळ असलेल्या नाल्यात पडून वाहून गेलेल्या ६५ वर्षीय महिलेचा मृतदेह अखेर सापडला आहे. ही दुर्दैवी घटना बुधवारी रात्री घडली होती. गुरुवारी सकाळी वारजे स्मशानभूमीजवळील पाण्यातून अग्निशमन दलाच्या जवानांनी मृतदेह बाहेर काढला. मृत महिलेचे नाव शोभा मनोहर महिमाने (वय ६५) असे आहे. मिळालेल्या प्राथमिक माहितीनुसार, त्या कोल्हापूरहून पुण्यात आल्या होत्या आणि त्यानंतर बेंगळुरू हायवेवरील नवले पुलावर उतरून रिक्षा पकडण्यासाठी रस्ता ओलांडत होत्या. यावेळी रस्त्याच्या कडेला असलेल्या नाल्यात त्यांचा पाय घसरला आणि त्या पाण्याच्या प्रवाहात वाहून गेल्या.

या घटनेनंतर पोलीस आणि अग्निशमन विभागाच्या मदतीने शोधमोहीम सुरू करण्यात आली होती. अखेर दुसऱ्या दिवशी त्यांचा मृतदेह वारजे परिसरात सापडला.