संजय गडदे

Mumbai Crime News : मुंबईच्या जुहू परिसरात एक खळबळजनक घटना घडली आहे. एका व्यक्तीचा मृतदेह झाडाला लटकलेल्या अवस्थेत आढळून आला आहे. पोलिसांनी मृतदेह खाली उतरवून ताब्यात घेतला आहे. हा मृतदेह आता वैद्यकीय तपासणी आणि शवविच्छेदनासाठी पाठविण्यात आला आहे, अशी माहिती जुहू पोलिसांनी दिली आहे. (Latest Mumbai Crime News)

पोलिसांनी दिलेल्या माहितीनुसार, गुलमोहर रोड 5 आणि 6 जवळील 151 येथील मोकळ्या जागेवरील झाडावर हा मृतदेह लटकत्या अवस्थेत होता. जुहू पोलिसांनी मृतदेह खाली उतरवून ताब्यात घेतला. तसेच विलेपार्ले पश्चिमेकडील महापालिकेच्या कुपर रुग्णालयात दाखल केला आहे.

इथे मृतदेहाची वैद्यकीय तपासणी आणि शवविच्छेदन केले जाणार आहे. आरीफ इसाक इरुस हाझी (४२ वर्षे)असं मृत व्यक्तीचं नाव असल्याची माहिती मिळाली आहे.

दरम्यान, मृतदेहाची ओळख पटली असून ही हत्या आहे की, आत्महत्या याबाबत शवविच्छेदन अहवालानंतरच माहिती मिळू शकणार आहे. मात्र परिसरात अशा पद्धतीने व्यक्तीचा मृतदेह आढळला असल्याने एकच खळबळ उडाली आहे. तसेच नागरिकांमध्ये भीतीचे वातावरण पसरले आहे.