स्थानिक स्वराज्य संस्थांच्या निवडणुकींच्या पार्श्वभूमीवर भाजप नेत्यांनी महाराष्ट्र पिंजून काढायला सुरुवात केली आहे. मंत्री चंद्रशेखर बावनकुळे देखील भाजप उमेदवारांचा जोरदार प्रचार करताना दिसत आहेत. याच स्थानिक स्वराज्य संस्थांच्या निवडणुकीच्या पार्श्वभूमीवर गडचिरोलीत राजकीय वातावरण तापलं आहे. या निवडणुकीच्या रणधुमाळीदरम्यान 'मी स्टार प्रचारक आहे. खर्चाची अजिबात चिंता करू नका, असं मंत्री चंद्रशेखर बावनकुळे यांनी म्हटलं. बावनकुळे यांच्या वक्तव्याने राजकीय वर्तुळात चर्चांना उधाण आलं आहे.

चंद्रशेखर बावनकुळे आज गडचिरोलीच्या दौऱ्यावर होते. या दौऱ्यादरम्यान त्यांनी भाजपच्या उमेदवाराच्या प्रचाराच्या कार्यक्रमाला हजेरी लावली. या कार्यक्रमात काही महिला उन्हात बसलेल्या दिसल्या. लाडक्या बहिणीसाठी मंडप मोठा का बांधला नाही, असा सवाल बावनकुळे यांनी कार्यक्रमाच्या आयोजकांना केला.

बावनकुळेंच्या प्रश्नावर भाजप नेत्यांनी बजेट कमी असल्याचे कारण सांगितलं. खर्चाचा हिशोब निवडणूक अधिकाऱ्यांना द्यावा लागतो. यावर बावनकुळे म्हणाले, 'मी स्टार प्रचारक आहे. मला हिशोब देण्याची गरज नाही'. पुढे म्हणाले, 'निवडणूक आयोगाला हिशोब दाखवू. वाढीव ५० रुपयांच्या खर्चाची ही बाब आहे. तुम्ही बजेटचं अजिबात टेन्शन घेऊ नका'. बावनकुळे यांनी केलेल्या या वक्तव्याने राजकीय वर्तुळात चर्चांना उधाण आलं आहे. विरोधकांनी भाजप नेते बावनकुळे यांच्यावर जोरदार टीका केली आहे.

बावनकुळे यांनी नेमकं काय म्हटलं?

'आम्ही निवडणूक आयोगाला हिशोब देऊ. तुम्ही खर्चाची चिंता करू नका. पडदा लावण्याचे अवघे ५० रुपये खर्चात मोजले जातील. मी स्टार प्रचारक आहे. मी राज्यात आहे. आपण राज्यात हिशोब देऊ,असे ते म्हणाले.