आगामी स्थानिक स्वराज्य संस्थांच्या निवडणुकांसाठी राज्यभरात राजकीय घडामोडींना वेग आला आहे. प्रत्येक राजकीय पक्षाने मोर्चेबांधणीला सुरूवात केली आहे. तसेच पक्षांतर, गटबाजी आणि नाराजीनाट्य यामुळे अनेक जिल्ह्यांमध्ये उलथापालथ पाहायला मिळत आहे. याच पार्श्वभूमिवर वणीमध्ये भाजपला गळती लागली असून, ठाकरे गटात जोरदार इनकमिंग सुरू आहे. ठाकरे गटाच्या पाठिशी मोठा जनसमर्थन लाट उमटत असल्याचं चित्र आहे.

यवतमाळच्या वणीमध्ये ठाकरे गटाची ताकद वाढली. भाजपमधील २ माजी जिल्हा परिषद सदस्यांनी ठाकरे गटात जाहीर प्रवेश केला आहे. त्यांचा पक्षप्रवेश मातोश्रीवर पार पडला असून, शिवसेना पक्षप्रमुख उद्धव बाळासाहेब ठाकरे यांच्या उपस्थितीत त्यांचा पक्षप्रवेश पार पडला आहे.

माजी जिल्हा परिषद सदस्यांनी उद्धव ठाकरेंच्या उपस्थितीत कमळची साथ सोडत मशाल हाती घेतलं आहे. यावेळी माजी जिल्हा परिषद सदस्यांसह विधानसभा मतदारसंघातील भाजप आणि काँग्रेस पक्षातील शेकडो पदाधिकाऱ्यांनी शिवसेना ठाकरे गटात जाहीर प्रवेश केला आहे.

आगामी जिल्हा परिषद, पंचायत समिती आणि नगरपालिका निवडणुका पाहता ठाकरे गटात जोरदार इनकमिंग सुरू आहे. या इनकमिंगमुळे वणीतील स्थानिक राजकारणात मोठा भूकंप झाल्याचे बोलले जात असून, येत्या काळात यवतमाळ जिल्ह्यात ठाकरे गटाची राजकीय पकड अधिक घट्ट होणार असल्याची शक्यता आहे.